ਗਾਜ਼ਾ ਸੰਘਰਸ਼ ਖ਼ਤਮ ਕਰਨ ਲਈ ਵਿਚੋਲਗੀ ਕਰ ਰਹੇ ਤੁਰਕੀ, ਮਿਸਰ ਅਤੇ ਕਤਰ ਨੇ ਹਾਲੀਆ ਇਜ਼ਰਾਈਲੀ ਹਮਲਿਆਂ ਦੀ ਨਿੰਦਾ ਕਰਦਿਆਂ ਜੰਗਬੰਦੀ ਦੀਆਂ ਸ਼ਰਤਾਂ ਦੀ ਪਾਲਣਾ ਕਰਨ ਦੀ ਅਪੀਲ ਕੀਤੀ ਹੈ। ਤਿੰਨਾਂ ਦੇਸ਼ਾਂ ਨੇ ਕਿਹਾ ਕਿ ਹਮਲੇ ਅਜਿਹੇ ਸਮੇਂ ਹੋ ਰਹੇ ਹਨ ਜਦੋਂ ਜੰਗ ਖ਼ਤਮ ਕਰਨ ਲਈ ਅਹਿਮ ਕੂਟਨੀਤਕ ਯਤਨ ਜਾਰੀ ਹਨ ਅਤੇ ਇਹ ਤਣਾਅ ਵਧਾ ਸਕਦੇ ਹਨ।
ਮੈਡੀਕਲ ਅਧਿਕਾਰੀਆਂ ਮੁਤਾਬਕ ਮੰਗਲਵਾਰ ਤੋਂ ਗਾਜ਼ਾ ਵਿੱਚ ਇਜ਼ਰਾਈਲੀ ਹਮਲਿਆਂ ਕਾਰਨ ਘੱਟੋ-ਘੱਟ 16 ਫਲਸਤੀਨੀ ਮਾਰੇ ਗਏ ਹਨ। ਇਜ਼ਰਾਈਲ ਦਾ ਕਹਿਣਾ ਹੈ ਕਿ ਉਸ ਦੇ ਹਮਲੇ ਹਮਾਸ ਦੇ ਲੜਾਕਿਆਂ ਨੂੰ ਨਿਸ਼ਾਨਾ ਬਣਾ ਰਹੇ ਹਨ। ਇਸ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਦੂਤ ਜੈਰਡ ਕੁਸ਼ਨਰ ਦੀ ਖੇਤਰੀ ਯਾਤਰਾ ਵੀ ਬਿਨਾਂ ਕਿਸੇ ਵੱਡੀ ਤਰੱਕੀ ਦੇ ਸਮਾਪਤ ਹੋਈ।
ਟਰੰਪ ਦੀ ਯੋਜਨਾ ਤਹਿਤ ਹਮਾਸ ਵੱਲੋਂ ਪੜਾਅਵਾਰ ਹਥਿਆਰ ਛੱਡਣ ਅਤੇ ਇਸ ਦੇ ਬਦਲੇ ਇਜ਼ਰਾਈਲੀ ਫੌਜ ਦੀ ਗਾਜ਼ਾ ਤੋਂ ਵਾਪਸੀ ਦਾ ਪ੍ਰਸਤਾਵ ਹੈ। ਹਾਲਾਂਕਿ ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਇਸ ਕ੍ਰਮ ਨੂੰ ਰੱਦ ਕਰਦਿਆਂ ਪਹਿਲਾਂ ਹਮਾਸ ਦੇ ਪੂਰੀ ਤਰ੍ਹਾਂ ਨਿਹੱਥੇ ਹੋਣ ਦੀ ਮੰਗ ਕੀਤੀ ਹੈ। ਹਮਾਸ ਦੂਜੇ ਪਾਸੇ ਇਜ਼ਰਾਈਲ ਤੋਂ ਜੰਗਬੰਦੀ ਦੀ ਪੂਰੀ ਪਾਲਣਾ ਅਤੇ ਗਾਜ਼ਾ ਤੋਂ ਫੌਜ ਵਾਪਸ ਬੁਲਾਉਣ ਦੀ ਮੰਗ ਕਰ ਰਿਹਾ ਹੈ।
ਵਿਚੋਲਗੀ ਕਰ ਰਹੇ ਦੇਸ਼ਾਂ ਨੇ ਅੰਤਰਰਾਸ਼ਟਰੀ ਭਾਈਚਾਰੇ ਅਤੇ ਜੰਗਬੰਦੀ ਦੀ ਨਿਗਰਾਨੀ ਕਰ ਰਹੇ ਟਰੰਪ ਦੇ ‘ਬੋਰਡ ਆਫ਼ ਪੀਸ’ ਨੂੰ ਹਾਲਾਤ ਹੋਰ ਵਿਗੜਨ ਤੋਂ ਰੋਕਣ ਲਈ ਤੁਰੰਤ ਕਦਮ ਚੁੱਕਣ ਦੀ ਅਪੀਲ ਕੀਤੀ ਹੈ।
