ਨਵੀਂ ਦਿੱਲੀ: ਮੱਧ ਪੂਰਬ ਵਿੱਚ ਵਧਦੇ ਤਣਾਅ ਅਤੇ ਈਰਾਨ-ਇਜ਼ਰਾਈਲ ਟਕਰਾਅ ਦੇ ਦਰਮਿਆਨ ਭਾਰਤ ਲਈ ਵੱਡੀ ਕੂਟਨੀਤਕ ਅਤੇ ਰਣਨੀਤਕ ਰਾਹਤ ਦੀ ਖ਼ਬਰ ਹੈ। ਲੰਬੇ ਸਮੇਂ ਤੋਂ ਹੋਰਮੁਜ਼ ਜਲਡਮਰੂ ਵਿੱਚ ਫਸੇ ਭਾਰਤੀ ਜਹਾਜ਼ਾਂ ਨੇ ਹੁਣ ਸੁਰੱਖਿਅਤ ਵਾਪਸੀ ਸ਼ੁਰੂ ਕਰ ਦਿੱਤੀ ਹੈ, ਜਿਸ ਨਾਲ ਦੇਸ਼ ਵਿੱਚ ਐਲਪੀਜੀ ਅਤੇ ਕੱਚੇ ਤੇਲ ਦੀ ਸਪਲਾਈ ਨੂੰ ਲੈ ਕੇ ਪੈਦਾ ਹੋਇਆ ਸੰਕਟ ਘਟਣ ਦੀ ਉਮੀਦ ਹੈ।
ਭਾਰਤੀ ਝੰਡੇ ਵਾਲਾ ਵਿਸ਼ਾਲ ਐਲਪੀਜੀ ਟੈਂਕਰ “ਸ਼ਿਵਾਲਿਕ” 45,000 ਮੀਟ੍ਰਿਕ ਟਨ ਤੋਂ ਵੱਧ LPG ਲੈ ਕੇ ਗੁਜਰਾਤ ਦੇ ਮੁੰਦਰਾ ਬੰਦਰਗਾਹ ’ਤੇ ਕੁਝ ਹੀ ਘੰਟਿਆਂ ਵਿੱਚ ਪਹੁੰਚਣ ਵਾਲਾ ਹੈ। ਇਸੇ ਤਰ੍ਹਾਂ “ਨੰਦਾ ਦੇਵੀ” ਟੈਂਕਰ 17 ਮਾਰਚ ਨੂੰ ਕਾਂਡਲਾ ਬੰਦਰਗਾਹ ’ਤੇ ਲੰਗਰ ਅੰਕਰੇਗਾ।
ਇਸ ਤੋਂ ਇਲਾਵਾ 80,800 ਟਨ ਕੱਚਾ ਤੇਲ ਲੈ ਕੇ ਆ ਰਿਹਾ “ਜਗ ਲਾਡਕੀ” ਟੈਂਕਰ ਫੁਜੈਰਾਹ ਤੋਂ ਸੁਰੱਖਿਅਤ ਰਵਾਨਾ ਹੋ ਚੁੱਕਾ ਹੈ, ਜਦਕਿ “ਜਗ ਪ੍ਰਕਾਸ਼” ਓਮਾਨ ਤੋਂ ਆਪਣੇ ਰਸਤੇ ’ਤੇ ਹੈ।
ਭਾਰਤ ਲਈ ਕਿੰਨਾ ਮਹੱਤਵਪੂਰਨ ਹੈ ਇਹ ਰਸਤਾ?
ਭਾਰਤ ਆਪਣਾ ਲਗਭਗ 88% ਕੱਚਾ ਤੇਲ ਅਤੇ 60% ਐਲਪੀਜੀ ਦਰਾਮਦ ਕਰਦਾ ਹੈ, ਜਿਸ ਵਿੱਚੋਂ ਕਰੀਬ 90% ਸਪਲਾਈ ਹੋਰਮੁਜ਼ ਜਲਡਮਰੂ ਰਾਹੀਂ ਆਉਂਦੀ ਹੈ। ਹਾਲੀਆ ਤਣਾਅ ਕਾਰਨ ਇਸ ਰਸਤੇ ਦੇ ਪ੍ਰਭਾਵਿਤ ਹੋਣ ਨਾਲ ਉਦਯੋਗਿਕ ਉਤਪਾਦਨ ਅਤੇ ਘਰੇਲੂ ਗੈਸ ਸਪਲਾਈ ’ਤੇ ਦਬਾਅ ਵਧ ਗਿਆ ਸੀ।
ਵਰਤਮਾਨ ਵਿੱਚ 22 ਭਾਰਤੀ ਜਹਾਜ਼ ਅਤੇ 611 ਮਲਾਹ ਫਾਰਸ ਦੀ ਖਾੜੀ ਦੇ ਪੱਛਮੀ ਹਿੱਸੇ ਵਿੱਚ ਮੌਜੂਦ ਹਨ, ਜਿਨ੍ਹਾਂ ਦੀ ਸੁਰੱਖਿਆ ’ਤੇ ਭਾਰਤੀ ਮੰਤਰਾਲੇ ਅਤੇ ਏਜੰਸੀਆਂ ਵੱਲੋਂ 24 ਘੰਟੇ ਨਿਗਰਾਨੀ ਕੀਤੀ ਜਾ ਰਹੀ ਹੈ।
ਇਨ੍ਹਾਂ ਟੈਂਕਰਾਂ ਦੀ ਵਾਪਸੀ ਨਾਲ ਬਾਜ਼ਾਰ ਵਿੱਚ ਸਥਿਰਤਾ ਆਉਣ ਅਤੇ ਐਲਪੀਜੀ-ਤੇਲ ਦੀ ਘਾਟ ਦੂਰ ਹੋਣ ਦੀ ਪੂਰੀ ਉਮੀਦ ਹੈ।
