ਲੰਡਨ / ਇੰਗਲੈਂਡ : ਇੰਗਲੈਂਡ ਤੋਂ ਕ੍ਰਿਕਟ ਜਗਤ ਲਈ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਇੰਗਲੈਂਡ ਦੇ ਸਾਬਕਾ ਕ੍ਰਿਕਟਰ ਅਤੇ ਸਸੈਕਸ ਕਾਉਂਟੀ ਕ੍ਰਿਕਟ ਕਲੱਬ ਦੇ ਸਾਬਕਾ ਚੀਫ਼ ਐਗਜ਼ੀਕਿਊਟਿਵ ਟੋਨੀ ਪਿਗੌਟ ਦਾ 67 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ ਹੈ। ਉਨ੍ਹਾਂ ਦੇ ਨਿਧਨ ਨਾਲ ਇੰਗਲਿਸ਼ ਕਾਉਂਟੀ ਕ੍ਰਿਕਟ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ।
ਟੋਨੀ ਪਿਗੌਟ ਨੇ ਸਾਲ 1978 ਵਿੱਚ ਸਿਰਫ਼ 20 ਸਾਲ ਦੀ ਉਮਰ ਵਿੱਚ ਸਸੈਕਸ ਲਈ ਫਰਸਟ ਕਲਾਸ ਕ੍ਰਿਕਟ ਵਿੱਚ ਡੈਬਿਊ ਕੀਤਾ ਸੀ ਅਤੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਨੂੰ ਯਾਦਗਾਰ ਬਣਾ ਦਿੱਤਾ। ਹੋਵ ਵਿੱਚ ਸਰੇ ਖ਼ਿਲਾਫ਼ ਖੇਡੇ ਗਏ ਮੁਕਾਬਲੇ ਦੌਰਾਨ ਉਨ੍ਹਾਂ ਨੇ ਆਪਣੇ ਪਹਿਲੇ ਹੀ ਫਰਸਟ ਕਲਾਸ ਵਿਕੇਟ ਨੂੰ ਹੈਟਰਿਕ ਵਿੱਚ ਬਦਲ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਸੀ।
ਵਿਆਹ ਲਈ ਟੈਸਟ ਡੈਬਿਊ ਮੁਲਤਵੀ
ਟੋਨੀ ਪਿਗੌਟ ਦਾ ਅੰਤਰਰਾਸ਼ਟਰੀ ਕਰੀਅਰ ਭਾਵੇਂ ਛੋਟਾ ਰਿਹਾ, ਪਰ ਕਾਫ਼ੀ ਵਿਲੱਖਣ ਸੀ। ਉਨ੍ਹਾਂ ਨੇ 1983-84 ਵਿੱਚ ਇੰਗਲੈਂਡ ਲਈ ਆਪਣਾ ਇਕਲੌਤਾ ਟੈਸਟ ਮੈਚ ਖੇਡਿਆ। ਉਸ ਵੇਲੇ ਉਹ ਨਿਊਜ਼ੀਲੈਂਡ ਵਿੱਚ ਕਲੱਬ ਕ੍ਰਿਕਟ ਖੇਡ ਰਹੇ ਸਨ, ਜਦੋਂ ਸੱਟਾਂ ਨਾਲ ਜੂਝ ਰਹੀ ਇੰਗਲਿਸ਼ ਟੀਮ ਨੂੰ ਉਨ੍ਹਾਂ ਦੀ ਲੋੜ ਪਈ। ਇਸ ਟੈਸਟ ਦੀ ਖਾਸ ਗੱਲ ਇਹ ਰਹੀ ਕਿ ਪਿਗੌਟ ਨੂੰ ਆਪਣਾ ਵਿਆਹ ਮੁਲਤਵੀ ਕਰਨਾ ਪਿਆ, ਜੋ ਮੈਚ ਤੋਂ ਬਾਅਦ ਸੋਮਵਾਰ ਨੂੰ ਹੋਣਾ ਸੀ।
ਸੱਟ ਕਾਰਨ ਜਲਦੀ ਸੰਨਿਆਸ
ਸਾਲ 1994 ਵਿੱਚ ਪਿਗੌਟ ਨੇ ਸਸੈਕਸ ਛੱਡ ਕੇ ਸਰੀ ਦਾ ਰੁਖ ਕੀਤਾ, ਪਰ ਪਿੱਠ ਦੀ ਗੰਭੀਰ ਸੱਟ ਕਾਰਨ 1996 ਵਿੱਚ ਉਨ੍ਹਾਂ ਨੂੰ ਕ੍ਰਿਕਟ ਤੋਂ ਸੰਨਿਆਸ ਲੈਣਾ ਪਿਆ। ਇਸ ਤੋਂ ਬਾਅਦ ਉਹ ਆਪਣੇ ਹੋਮ ਕਾਉਂਟੀ ਸਸੈਕਸ ਵਾਪਸ ਆ ਗਏ ਅਤੇ ਸੈਕਿੰਡ ਟੀਮ ਦੇ ਕੋਚ ਬਣੇ।
ਅਗਲੇ ਹੀ ਸਾਲ ਕਲੱਬ ਵਿੱਚ ਵੱਡੇ ਪ੍ਰਬੰਧਕੀ ਬਦਲਾਅ ਤੋਂ ਬਾਅਦ ਟੋਨੀ ਪਿਗੌਟ ਨੂੰ ਸਸੈਕਸ ਕ੍ਰਿਕਟ ਕਲੱਬ ਦਾ ਚੀਫ਼ ਐਗਜ਼ੀਕਿਊਟਿਵ ਨਿਯੁਕਤ ਕੀਤਾ ਗਿਆ। ਉਨ੍ਹਾਂ ਦੀ ਅਗਵਾਈ ਹੇਠ ਕਲੱਬ ਨੇ ਕਈ ਇਤਿਹਾਸਕ ਉਪਲਬਧੀਆਂ ਹਾਸਲ ਕੀਤੀਆਂ। ਸਸੈਕਸ ਸਥਾਈ ਫਲੱਡਲਾਈਟਾਂ ਲਗਾਉਣ ਵਾਲਾ ਪਹਿਲਾ ਕਾਉਂਟੀ ਕਲੱਬ ਬਣਿਆ ਅਤੇ 2003 ਵਿੱਚ ਕਲੱਬ ਨੇ ਆਪਣੀ ਪਹਿਲੀ ਕਾਉਂਟੀ ਚੈਂਪੀਅਨਸ਼ਿਪ ਦਾ ਖਿਤਾਬ ਜਿੱਤਿਆ।
ਕ੍ਰਿਕਟ ਜਗਤ ਵੱਲੋਂ ਸ਼ਰਧਾਂਜਲੀ
2003 ਦੀ ਚੈਂਪੀਅਨ ਟੀਮ ਦੇ ਕਪਤਾਨ ਕ੍ਰਿਸ ਐਡਮਜ਼ ਨੇ ਸਸੈਕਸ ਦੀ ਅਧਿਕਾਰਤ ਵੈੱਬਸਾਈਟ ‘ਤੇ ਭਾਵੁਕ ਸ਼ਰਧਾਂਜਲੀ ਭੇਟ ਕਰਦਿਆਂ ਲਿਖਿਆ ਕਿ ਟੋਨੀ ਪਿਗੌਟ ਕਲੱਬ ਦੇ ਇਤਿਹਾਸ ਦੇ ਸਭ ਤੋਂ ਵੱਡੇ ਬਦਲਾਅ ਲਿਆਉਣ ਵਾਲੇ ਵਿਅਕਤੀ ਸਨ। ਉਨ੍ਹਾਂ ਕਿਹਾ ਕਿ ਇਹ ਨਾ ਸਿਰਫ਼ ਪਿਗੌਟ ਪਰਿਵਾਰ, ਸਗੋਂ ਪੂਰੇ ਸਸੈਕਸ ਅਤੇ ਕ੍ਰਿਕਟ ਪਰਿਵਾਰ ਲਈ ਬਹੁਤ ਦੁਖਦਾਈ ਦਿਨ ਹੈ। ਐਡਮਜ਼ ਨੇ ਇਹ ਵੀ ਕਿਹਾ ਕਿ 1998 ਵਿੱਚ ਸਸੈਕਸ ਨਾਲ ਜੁੜਨ ਦਾ ਸਭ ਤੋਂ ਵੱਡਾ ਕਾਰਨ ਟੋਨੀ ਪਿਗੌਟ ਹੀ ਸਨ।
ਆਖਰੀ ਸਮੇਂ ਤੱਕ ਕ੍ਰਿਕਟ ਨਾਲ ਨਾਤਾ
1999 ਵਿੱਚ CEO ਦਾ ਅਹੁਦਾ ਛੱਡਣ ਤੋਂ ਬਾਅਦ ਵੀ ਟੋਨੀ ਪਿਗੌਟ ਕਾਉਂਟੀ ਕ੍ਰਿਕਟ ਨਾਲ ਜੁੜੇ ਰਹੇ। ਉਨ੍ਹਾਂ ਨੇ ਪਿਚ ਇੰਸਪੈਕਟਰ ਅਤੇ ਮੈਚ ਰੈਫਰੀ ਵਜੋਂ ਸੇਵਾ ਨਿਭਾਈ। ਖਰਾਬ ਸਿਹਤ ਦੇ ਬਾਵਜੂਦ, ਨਵੰਬਰ 2025 ਵਿੱਚ ਉਨ੍ਹਾਂ ਦੀ ਆਤਮਕਥਾ ‘Lester and the Deckchair Revolution’ ਪ੍ਰਕਾਸ਼ਿਤ ਹੋਈ।
ਟੋਨੀ ਪਿਗੌਟ ਦਾ ਯੋਗਦਾਨ ਸਿਰਫ਼ ਮੈਦਾਨ ਤੱਕ ਸੀਮਿਤ ਨਹੀਂ ਰਿਹਾ, ਸਗੋਂ ਪ੍ਰਸ਼ਾਸਨ, ਨੇਤ੍ਰਤਵ ਅਤੇ ਦੂਰਦਰਸ਼ੀ ਸੋਚ ਰਾਹੀਂ ਉਨ੍ਹਾਂ ਨੇ ਸਸੈਕਸ ਕ੍ਰਿਕਟ ਨੂੰ ਇੱਕ ਨਵੀਂ ਪਹਿਚਾਣ ਦਿੱਤੀ।
