ਕਾਠਮੰਡੂ: ਨੇਪਾਲ ਦੇ ਰਸੁਵਾ ਅਤੇ ਨੁਵਾਕੋਟ ਜ਼ਿਲ੍ਹਿਆਂ ਵਿੱਚ ਅਚਾਨਕ ਆਏ ਹੜ੍ਹਾਂ ਤੋਂ ਬਾਅਦ ਕਰੀਬ 600 ਬੱਚੇ ਅਜੇ ਵੀ ਲਾਪਤਾ ਦੱਸੇ ਜਾ ਰਹੇ ਹਨ। ਇਸ ਦੌਰਾਨ ਆਫ਼ਤ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਵੱਧ ਕੇ 1282 ਹੋ ਗਈ ਹੈ, ਜਦਕਿ 4700 ਤੋਂ ਵੱਧ ਲੋਕ ਲਾਪਤਾ ਹਨ।
ਨੇਪਾਲ-ਤਿੱਬਤ ਸਰਹੱਦ ਨੇੜੇ 26 ਅਗਸਤ ਨੂੰ ਬਰਫ਼ ਅਤੇ ਚੱਟਾਨਾਂ ਦੇ ਤੋਦੇ ਡਿੱਗਣ ਤੋਂ ਬਾਅਦ ਆਏ ਹੜ੍ਹ ਨੇ ਉੱਤਰੀ ਅਤੇ ਮੱਧ ਨੇਪਾਲ ਦੇ ਕਈ ਕਸਬਿਆਂ ਅਤੇ ਪਿੰਡਾਂ ਵਿੱਚ ਭਾਰੀ ਤਬਾਹੀ ਮਚਾਈ। ਸੁਰੱਖਿਆ ਬਲਾਂ ਦੀ ਸਾਂਝੀ ਕਮਾਂਡ ਵੱਲੋਂ ਵੱਖ-ਵੱਖ ਖੇਤਰਾਂ ਵਿੱਚ ਲਾਪਤਾ 4,798 ਲੋਕਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਕਈ ਜ਼ਿਲ੍ਹਿਆਂ ਵਿੱਚੋਂ ਲਾਸ਼ਾਂ ਬਰਾਮਦ
ਨੇਪਾਲ ਪੁਲਿਸ ਅਨੁਸਾਰ ਹੁਣ ਤੱਕ ਚਿਤਵਾਨ ਵਿੱਚ 359, ਨਵਲਪਰਾਸੀ ਪੂਰਬ ਵਿੱਚ 218, ਨਵਲਪਰਾਸੀ ਪੱਛਮ ਵਿੱਚ 208, ਨੁਵਾਕੋਟ ਵਿੱਚ 185, ਗੋਰਖਾ ਵਿੱਚ 72, ਧਾਡਿੰਗ ਵਿੱਚ 60, ਰਸੁਵਾ ਵਿੱਚ 140 ਅਤੇ ਤਾਨਾਹੁਨ ਵਿੱਚ 38 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ।
ਇਸ ਤੋਂ ਇਲਾਵਾ ਕਾਠਮੰਡੂ ਦੇ ਦੋ ਹਸਪਤਾਲਾਂ ਵਿੱਚ ਇਲਾਜ ਦੌਰਾਨ ਦੋ ਹੋਰ ਲੋਕਾਂ ਦੀ ਮੌਤ ਹੋਣ ਤੋਂ ਬਾਅਦ ਮ੍ਰਿਤਕਾਂ ਦੀ ਗਿਣਤੀ 1282 ਹੋ ਗਈ ਹੈ।
ਰਸੁਵਾ ਵਿੱਚ 280, ਨੁਵਾਕੋਟ ਵਿੱਚ 300 ਤੋਂ 350 ਬੱਚੇ ਲਾਪਤਾ
ਸਥਾਨਕ ਸਿੱਖਿਆ ਵਿਕਾਸ ਅਤੇ ਤਾਲਮੇਲ ਇਕਾਈਆਂ, ਸਥਾਨਕ ਸਰਕਾਰਾਂ ਅਤੇ ਵਿਦਿਅਕ ਸੰਸਥਾਵਾਂ ਵੱਲੋਂ ਇਕੱਠੇ ਕੀਤੇ ਅੰਕੜਿਆਂ ਅਨੁਸਾਰ ਰਸੁਵਾ ਵਿੱਚ ਕਰੀਬ 280 ਬੱਚੇ, ਜਦਕਿ ਗੁਆਂਢੀ ਨੁਵਾਕੋਟ ਵਿੱਚ 300 ਤੋਂ 350 ਬੱਚੇ ਅਜੇ ਵੀ ਲਾਪਤਾ ਹਨ।
ਨੁਵਾਕੋਟ ਸਿੱਖਿਆ ਵਿਕਾਸ ਅਤੇ ਤਾਲਮੇਲ ਇਕਾਈ ਦੇ ਮੁਖੀ ਸੂਰਿਆ ਬਹਾਦੁਰ ਖੱਤਰੀ ਨੇ ਕਿਹਾ ਕਿ ਲਾਪਤਾ ਵਿਦਿਆਰਥੀਆਂ ਬਾਰੇ ਪ੍ਰਮਾਣਿਤ ਜਾਣਕਾਰੀ ਇਕੱਠੀ ਕਰਨ ਲਈ ਹੈੱਡਮਾਸਟਰਾਂ ਨਾਲ ਲਗਾਤਾਰ ਸੰਪਰਕ ਕੀਤਾ ਜਾ ਰਿਹਾ ਹੈ।
ਸੰਚਾਰ ਪ੍ਰਬੰਧ ਪ੍ਰਭਾਵਿਤ ਹੋਣ ਕਾਰਨ ਸਹੀ ਅੰਕੜੇ ਇਕੱਠੇ ਕਰਨ ਵਿੱਚ ਮੁਸ਼ਕਲ ਆ ਰਹੀ ਹੈ। ਕੁਝ ਲਾਪਤਾ ਵਿਦਿਆਰਥੀਆਂ ਨੂੰ ਲੱਭ ਲਿਆ ਗਿਆ ਹੈ, ਪਰ ਵੱਖ-ਵੱਖ ਸਕੂਲਾਂ ਤੋਂ ਲਾਪਤਾ ਬੱਚਿਆਂ ਦੀਆਂ ਨਵੀਆਂ ਰਿਪੋਰਟਾਂ ਵੀ ਸਾਹਮਣੇ ਆ ਰਹੀਆਂ ਹਨ।
ਰਸੁਵਾ ਵਿੱਚ ਸਥਾਨਕ ਸਿੱਖਿਆ ਇਕਾਈ ਦੇ ਮੁਖੀ ਦੁਰਗਾ ਪ੍ਰਸਾਦ ਸਿਲਵਾਲ ਮੁਤਾਬਕ ਅਧਿਕਾਰਤ ਤਸਦੀਕ ਜਾਰੀ ਹੈ, ਪਰ ਸ਼ੁਰੂਆਤੀ ਰਿਕਾਰਡਾਂ ਅਨੁਸਾਰ ਜ਼ਿਲ੍ਹੇ ਵਿੱਚ ਇਸ ਸਮੇਂ 280 ਵਿਦਿਆਰਥੀ ਲਾਪਤਾ ਹਨ।
ਅਧਿਆਪਕ ਵੀ ਲਾਪਤਾ, 22 ਸਕੂਲ ਪ੍ਰਭਾਵਿਤ
ਰਿਪੋਰਟਾਂ ਮੁਤਾਬਕ ਰਸੁਵਾ ਵਿੱਚ 16 ਅਧਿਆਪਕ ਲਾਪਤਾ ਹਨ, ਜਦਕਿ ਨੁਵਾਕੋਟ ਵਿੱਚ 6 ਅਧਿਆਪਕਾਂ ਦੇ ਲਾਪਤਾ ਹੋਣ ਦੀ ਪੁਸ਼ਟੀ ਹੋਈ ਹੈ।
ਸਿੱਖਿਆ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ ਹੜ੍ਹਾਂ ਕਾਰਨ ਰਸੁਵਾ, ਨੁਵਾਕੋਟ ਅਤੇ ਧਾਡਿੰਗ ਵਿੱਚ 22 ਸਕੂਲ ਪ੍ਰਭਾਵਿਤ ਹੋਏ ਹਨ, ਜਿਨ੍ਹਾਂ ਵਿੱਚੋਂ 12 ਸਕੂਲ ਪੂਰੀ ਤਰ੍ਹਾਂ ਤਬਾਹ ਹੋ ਗਏ ਹਨ।
10ਵੇਂ ਦਿਨ ਸੁਰੰਗ ਵਿੱਚੋਂ ਦੋ ਲੋਕ ਜ਼ਿੰਦਾ ਬਚਾਏ
ਇਸ ਭਿਆਨਕ ਆਫ਼ਤ ਦੇ 10 ਦਿਨ ਬਾਅਦ ਬਚਾਅ ਟੀਮਾਂ ਨੇ ਭੋਟੇਕੋਹੀ ਵਿੱਚ ਤ੍ਰਿਸ਼ੂਲੀ 3ਏ ਪਣ-ਬਿਜਲੀ ਪ੍ਰੋਜੈਕਟ ਦੀ ਇੱਕ ਸੁਰੰਗ ਵਿੱਚੋਂ ਦੋ ਵਿਅਕਤੀਆਂ ਨੂੰ ਜ਼ਿੰਦਾ ਬਚਾ ਲਿਆ।
ਬਚਾਏ ਗਏ ਵਿਅਕਤੀਆਂ ਦੀ ਪਛਾਣ ਕਬੀਰ ਮਹਾਜਨ (45) ਅਤੇ ਸੰਜੇ ਸਾਹ (30) ਵਜੋਂ ਹੋਈ ਹੈ। ਨੇਪਾਲ ਫੌਜ ਦੇ ਲੋਕ ਸੰਪਰਕ ਡਾਇਰੈਕਟੋਰੇਟ ਮੁਤਾਬਕ ਮਹਾਜਨ ਪ੍ਰੋਜੈਕਟ ਵਿੱਚ ਮਕੈਨੀਕਲ ਸੁਪਰਵਾਈਜ਼ਰ ਅਤੇ ਸਾਹ ਫੋਰਮੈਨ ਵਜੋਂ ਕੰਮ ਕਰ ਰਿਹਾ ਸੀ।
ਬਚਾਅ ਕਰਮਚਾਰੀਆਂ ਨੇ ਸੁਰੰਗ ਦੇ ਅੰਦਰੋਂ ਆਵਾਜ਼ਾਂ ਸੁਣੀਆਂ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਅੰਦਰ ਫਸੇ ਲੋਕਾਂ ਨਾਲ ਸੰਪਰਕ ਸਥਾਪਤ ਕੀਤਾ। ਆਵਾਜ਼ਾਂ ਦਾ ਪਤਾ ਲੱਗਣ ਤੋਂ ਬਾਅਦ ਨੇਪਾਲੀ ਫੌਜ ਅਤੇ ਹਥਿਆਰਬੰਦ ਪੁਲਿਸ ਬਲ ਨੇ ਬਚਾਅ ਕਾਰਜ ਤੇਜ਼ ਕਰ ਦਿੱਤਾ ਅਤੇ ਵਿਸ਼ੇਸ਼ ਉਪਕਰਣਾਂ ਦੀ ਮਦਦ ਨਾਲ ਦੋਵਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ।
