ਵਿਸ਼ਵ: ਕੋਰੋਨਾ ਮਹਾਂਮਾਰੀ ਤੋਂ ਬਾਅਦ ਹੁਣ ਅਫ਼ਰੀਕੀ ਦੇਸ਼ ਕਾਂਗੋ ਲੋਕਤੰਤਰੀ ਗਣਰਾਜ ਵਿੱਚ ਇਬੋਲਾ ਵਾਇਰਸ ਦੇ ਵਧਦੇ ਮਾਮਲਿਆਂ ਨੇ ਸਿਹਤ ਮਾਹਿਰਾਂ ਦੀ ਚਿੰਤਾ ਵਧਾ ਦਿੱਤੀ ਹੈ। ਤਾਜ਼ਾ ਅੰਕੜਿਆਂ ਮੁਤਾਬਕ ਦੇਸ਼ ਵਿੱਚ ਇਬੋਲਾ ਦੇ 550 ਮਾਮਲੇ ਸਾਹਮਣੇ ਆ ਚੁੱਕੇ ਹਨ, ਜਦਕਿ 101 ਲੋਕਾਂ ਦੀ ਮੌਤ ਹੋ ਗਈ ਹੈ। ਵਾਇਰਸ ਦੇ ਤੇਜ਼ੀ ਨਾਲ ਫੈਲਣ ਕਾਰਨ ਸਥਿਤੀ ਗੰਭੀਰ ਬਣਦੀ ਜਾ ਰਹੀ ਹੈ।
ਸਿਹਤ ਅਧਿਕਾਰੀਆਂ ਅਨੁਸਾਰ ਪੂਰਬੀ ਸੂਬਿਆਂ ਇਟੂਰੀ ਪ੍ਰਾਂਤ ਅਤੇ ਉੱਤਰੀ ਕਿਵੂ ਵਿੱਚ ਇੱਕ ਹੀ ਦਿਨ ਦੌਰਾਨ 35 ਨਵੇਂ ਮਾਮਲੇ ਅਤੇ 10 ਮੌਤਾਂ ਦਰਜ ਕੀਤੀਆਂ ਗਈਆਂ। ਹਾਲਾਂਕਿ 7 ਮਰੀਜ਼ਾਂ ਦੇ ਠੀਕ ਹੋਣ ਨਾਲ ਕੁੱਲ 19 ਲੋਕ ਸਿਹਤਯਾਬ ਹੋ ਕੇ ਘਰ ਵਾਪਸ ਪਰਤ ਚੁੱਕੇ ਹਨ। ਇਸ ਦੇ ਬਾਵਜੂਦ, ਹਰ ਹਫ਼ਤੇ ਵਧ ਰਹੇ ਕੇਸ ਮਹਾਂਮਾਰੀ ਦੇ ਫੈਲਾਅ ਵੱਲ ਇਸ਼ਾਰਾ ਕਰ ਰਹੇ ਹਨ।
ਵਾਇਰਸ ਦੀ ਲੜੀ ਤੋੜਨ ਲਈ ਸਿਹਤ ਵਿਭਾਗ ਨੇ ਸੰਪਰਕ ਟਰੇਸਿੰਗ ਮੁਹਿੰਮ ਤੇਜ਼ ਕਰ ਦਿੱਤੀ ਹੈ। 5,418 ਸੰਭਾਵਿਤ ਸੰਪਰਕਾਂ ਵਿੱਚੋਂ ਹੁਣ ਤੱਕ 3,489 ਲੋਕਾਂ ਦੀ ਪਛਾਣ ਅਤੇ ਨਿਗਰਾਨੀ ਕੀਤੀ ਜਾ ਸਕੀ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਦਰ ਹਾਲੇ ਵੀ ਲੋੜੀਂਦੇ ਪੱਧਰ ਤੋਂ ਘੱਟ ਹੈ, ਜਿਸ ਕਾਰਨ ਲਾਗ ਦੇ ਹੋਰ ਫੈਲਣ ਦਾ ਖ਼ਤਰਾ ਬਣਿਆ ਹੋਇਆ ਹੈ।
ਇਸ ਦਰਮਿਆਨ ਉੱਤਰੀ ਕਿਵੂ ਦੀਆਂ ਪ੍ਰਯੋਗਸ਼ਾਲਾਵਾਂ ਉੱਤੇ ਭਾਰੀ ਦਬਾਅ ਹੈ। ਰੀਐਜੈਂਟਸ ਦੀ ਘਾਟ ਕਾਰਨ 183 ਨਮੂਨਿਆਂ ਦੇ ਟੈਸਟ ਨਤੀਜੇ ਅਜੇ ਵੀ ਬਾਕੀ ਹਨ, ਜਿਸ ਨਾਲ ਅਸਲ ਸਥਿਤੀ ਦਾ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੋ ਰਿਹਾ ਹੈ।
ਸਿਹਤ ਮਾਹਿਰਾਂ ਮੁਤਾਬਕ ਇਹ ਪ੍ਰਕੋਪ ਇਬੋਲਾ ਦੇ ਬੁੰਡੀਬੁਗਯੋ ਸਟ੍ਰੇਨ ਕਾਰਨ ਹੋਇਆ ਹੈ। ਭਾਵੇਂ ਇਹ ਸਟ੍ਰੇਨ ਆਮ ਤੌਰ ‘ਤੇ ਘੱਟ ਮਿਲਦਾ ਹੈ, ਪਰ ਇਹ ਗੰਭੀਰ ਬਿਮਾਰੀ ਅਤੇ ਮੌਤ ਦਾ ਕਾਰਨ ਬਣ ਸਕਦਾ ਹੈ। ਸਭ ਤੋਂ ਵੱਡੀ ਚਿੰਤਾ ਇਹ ਹੈ ਕਿ ਪ੍ਰਭਾਵਿਤ ਖੇਤਰਾਂ ਇਟੂਰੀ ਪ੍ਰਾਂਤ, ਉੱਤਰੀ ਕਿਵੂ ਅਤੇ ਦੱਖਣੀ ਕਿਵੂ ਦੀ ਕੁੱਲ ਆਬਾਦੀ ਲਗਭਗ 1.5 ਕਰੋੜ ਹੈ।
ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਤੁਰੰਤ ਅਤੇ ਪ੍ਰਭਾਵਸ਼ਾਲੀ ਨਿਯੰਤਰਣ ਕਦਮ ਨਾ ਚੁੱਕੇ ਗਏ ਤਾਂ ਇਬੋਲਾ ਦਾ ਇਹ ਪ੍ਰਕੋਪ ਇੱਕ ਵੱਡੇ ਸਿਹਤ ਸੰਕਟ ਵਿੱਚ ਤਬਦੀਲ ਹੋ ਸਕਦਾ ਹੈ।
