ਈਰਾਨ-ਇਜ਼ਰਾਈਲ ਤਣਾਅ ਵਿਚਕਾਰ ਸੁਖਦ ਖ਼ਬਰ: ਏਅਰ ਇੰਡੀਆ ਦੀਆਂ ਪੱਛਮੀ ਦੇਸ਼ਾਂ ਲਈ ਉਡਾਣਾਂ ਮੁੜ ਆਮ

ਨਵੀਂ ਦਿੱਲੀ: ਈਰਾਨ-ਇਜ਼ਰਾਈਲ ਜੰਗ ਦੇ ਤਣਾਅਪੂਰਨ ਮਾਹੌਲ ਵਿੱਚ ਹਵਾਈ ਯਾਤਰੀਆਂ ਲਈ ਰਾਹਤ ਦੀ ਖ਼ਬਰ ਆਈ ਹੈ। ਏਅਰ ਇੰਡੀਆ ਨੇ ਐਲਾਨ ਕੀਤਾ ਹੈ ਕਿ ਅਮਰੀਕਾ, ਕੈਨੇਡਾ, ਯੂਰਪ ਅਤੇ ਯੂ.ਕੇ ਲਈ ਉਸ ਦੀਆਂ ਸਾਰੀਆਂ ਨਿਰਧਾਰਤ ਉਡਾਣਾਂ ਹੁਣ ਆਮ ਤਰ੍ਹਾਂ ਚੱਲ ਰਹੀਆਂ ਹਨ।

ਹਾਲਾਂਕਿ, ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇਹ ਉਡਾਣਾਂ ਮੱਧ ਪੂਰਬ ਦੇ ਪ੍ਰਤੀਬੰਧਿਤ ਹਵਾਈ ਖੇਤਰ ਤੋਂ ਬਚਦੀਆਂ ਹੋਈਆਂ ਬਦਲਵੇਂ ਰੂਟਾਂ ਰਾਹੀਂ ਚਲ ਰਹੀਆਂ ਹਨ।

ਮੱਧ ਪੂਰਬ ਲਈ ਉਡਾਣਾਂ ਅਜੇ ਮੁਅੱਤਲ

ਭਾਵੇਂ ਪੱਛਮੀ ਦੇਸ਼ਾਂ ਲਈ ਸੇਵਾ ਬਹਾਲ ਹੋ ਗਈ ਹੈ, ਪਰ ਮੱਧ ਪੂਰਬ ਜਾਣ ਵਾਲੀਆਂ ਉਡਾਣਾਂ ‘ਤੇ ਅਜੇ ਵੀ ਅਸਰ ਹੈ। ਏਅਰ ਇੰਡੀਆ ਨੇ ਦੱਸਿਆ ਹੈ ਕਿ ਉੱਥੇ ਦਾ ਹਵਾਈ ਖੇਤਰ ਬੰਦ ਹੋਣ ਕਰਕੇ 3 ਮਾਰਚ ਰਾਤ 11:59 ਵਜੇ ਤੱਕ ਉਡਾਣਾਂ ਮੁਅੱਤਲ ਰਹਿਣਗੀਆਂ।

ਪ੍ਰਭਾਵਿਤ ਯਾਤਰੀਆਂ ਨੂੰ:

• ਪੂਰਾ ਰਿਫੰਡ

• ਮੁਫ਼ਤ ਰੀਸ਼ਡਿਊਲਿੰਗ

• ਵਿਕਲਪਿਕ ਉਡਾਣ ਪ੍ਰਬੰਧ

ਦੀ ਸਹੂਲਤ ਦਿੱਤੀ ਜਾ ਰਹੀ ਹੈ।

ਇੰਡੀਗੋ ਵੱਲੋਂ ਵਿਸ਼ੇਸ਼ ਰਾਹਤ ਉਡਾਣਾਂ

ਇੰਡੀਗੋ 3 ਮਾਰਚ ਨੂੰ ਜੇਦਾਹ (ਸਾਊਦੀ ਅਰਬ) ਤੋਂ ਮੁੰਬਈ, ਹੈਦਰਾਬਾਦ ਅਤੇ ਅਹਿਮਦਾਬਾਦ ਲਈ 10 ਵਿਸ਼ੇਸ਼ ਰਾਹਤ ਉਡਾਣਾਂ ਚਲਾਏਗਾ। ਇਹ ਕਾਰਵਾਈ ਭਾਰਤੀ ਕੌਂਸਲੇਟ ਦੇ ਸਹਿਯੋਗ ਨਾਲ ਕੀਤੀ ਜਾ ਰਹੀ ਹੈ, ਤਾਂ ਜੋ ਫਸੇ ਹੋਏ ਯਾਤਰੀ ਸੁਰੱਖਿਅਤ ਤਰੀਕੇ ਨਾਲ ਵਾਪਸ ਆ ਸਕਣ।

ਅਬੂ ਧਾਬੀ ਤੋਂ ਦਿੱਲੀ ਪਹੁੰਚੀ ਪਹਿਲੀ ਫਲਾਈਟ ਦੇ ਯਾਤਰੀ ਭਾਰਤ ਆਉਂਦੇ ਹੀ ਭਾਵੁਕ ਦਿਖਾਈ ਦਿੱਤੇ।

ਸਰਕਾਰ ਵੱਲੋਂ ਲਗਾਤਾਰ ਨਿਗਰਾਨੀ

ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਰਾਮ ਮੋਹਨ ਨਾਇਡੂ ਕਿਨਜਾਰਪੋ ਨੇ ਉੱਚ ਪੱਧਰੀ ਮੀਟਿੰਗ ਕਰਕੇ ਸਥਿਤੀ ਦੀ ਸਮੀਖਿਆ ਕੀਤੀ। ਮੰਤਰਾਲੇ ਨੇ ਕਿਹਾ ਹੈ ਕਿ ਅੰਤਰਰਾਸ਼ਟਰੀ ਹਵਾਈ ਖੇਤਰ ਦੀ ਲਗਾਤਾਰ ਨਿਗਰਾਨੀ ਕੀਤੀ ਜਾ ਰਹੀ ਹੈ ਅਤੇ ਲੰਬੀ ਦੂਰੀ ਦੀਆਂ ਉਡਾਣਾਂ ਜੰਗ ਵਾਲੇ ਖੇਤਰਾਂ ਤੋਂ ਦੂਰ ਰੂਟਾਂ ਰਾਹੀਂ ਚਲਾਈਆਂ ਜਾ ਰਹੀਆਂ ਹਨ।

ਸਾਰੀਆਂ ਏਅਰਲਾਈਨਾਂ ਨੂੰ ਹੁਕਮ ਦਿੱਤੇ ਗਏ ਹਨ ਕਿ ਯਾਤਰੀਆਂ ਨੂੰ ਰਿਫੰਡ ਅਤੇ ਤਾਜ਼ਾ ਜਾਣਕਾਰੀ ਸਮੇਂ-ਸਮੇਂ ’ਤੇ ਦਿੱਤੀ ਜਾਵੇ।

ਤੇਲ ਦੀਆਂ ਕੀਮਤਾਂ ’ਚ ਵਾਧਾਜੰਗ ਕਾਰਨ ਕੱਚੇ ਤੇਲ ਦੀ ਕੀਮਤ 80 ਡਾਲਰ ਪ੍ਰਤੀ ਬੈਰਲ ਤੋਂ ਪਾਰ ਚਲੀ ਗਈ ਹੈ। ਮਾਹਿਰਾਂ ਅਨੁਸਾਰ, ਇਸ ਦਾ ਅਸਰ ਆਉਣ ਵਾਲੇ ਦਿਨਾਂ ਵਿੱਚ ਹਵਾਈ ਕਿਰਾਏ ’ਤੇ ਵੀ ਪੈ ਸਕਦਾ ਹੈ।