ਮੰਡੀ ਬਹਾਉੱਦੀਨ ਵਿੱਚ ਵਾਪਰੀ ਘਟਨਾ, ਪਰਿਵਾਰ ਨੇ ਧਾਰਮਿਕ ਪਛਾਣ ਕਾਰਨ ਨਿਸ਼ਾਨਾ ਬਣਾਉਣ ਦਾ ਲਗਾਇਆ ਦੋਸ਼
ਲਾਹੌਰ: ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੇ ਮੰਡੀ ਬਹਾਉੱਦੀਨ ਜ਼ਿਲ੍ਹੇ ਵਿੱਚ ਅਹਿਮਦੀਆ ਭਾਈਚਾਰੇ ਦੇ 65 ਸਾਲਾ ਆਗੂ ਸਫ਼ਦਰ ਮਹਮੂਦ ਦੀ ਅਣਪਛਾਤੇ ਹਮਲਾਵਰਾਂ ਨੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ। ਇਹ ਘਟਨਾ 2 ਸਤੰਬਰ ਦੀ ਸ਼ਾਮ ਨੂੰ ਈਦਗਾਹ ਮੈਦਾਨ ਦੇ ਪ੍ਰਵੇਸ਼ ਦੁਆਰ ਨੇੜੇ ਵਾਪਰੀ।
ਅਹਿਮਦੀਆ ਭਾਈਚਾਰੇ ਮੁਤਾਬਕ ਹਮਲਾਵਰਾਂ ਨੇ ਸਫ਼ਦਰ ਮਹਮੂਦ ’ਤੇ ਗੋਲੀਆਂ ਚਲਾਈਆਂ, ਜਿਸ ਕਾਰਨ ਉਨ੍ਹਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਉਨ੍ਹਾਂ ਦੇ ਪਰਿਵਾਰ ਵਿੱਚ ਪਤਨੀ ਅਤੇ ਦੋ ਪੁੱਤਰ ਹਨ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਅਹਿਮਦੀਆ ਭਾਈਚਾਰੇ ਦੇ ਮੁੱਖ ਕੇਂਦਰ ਰਬਵਾਹ ਵਿੱਚ ਕੀਤਾ ਗਿਆ।
ਪਰਿਵਾਰ ਨੇ ਧਾਰਮਿਕ ਪਛਾਣ ਕਾਰਨ ਹੱਤਿਆ ਦਾ ਲਗਾਇਆ ਦੋਸ਼
ਮ੍ਰਿਤਕ ਦੇ ਪੁੱਤਰ ਕਮਰਾਨ ਸਫ਼ਦਰ ਨੇ ਪੁਲਿਸ ਕੋਲ ਦਰਜ ਕਰਵਾਈ ਸ਼ਿਕਾਇਤ ਵਿੱਚ ਕਿਹਾ ਕਿ ਉਨ੍ਹਾਂ ਦੇ ਪਿਤਾ ਦੀ ਕਿਸੇ ਨਾਲ ਕੋਈ ਦੁਸ਼ਮਣੀ ਨਹੀਂ ਸੀ। ਪਰਿਵਾਰ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੂੰ ਧਾਰਮਿਕ ਪਛਾਣ ਕਾਰਨ ਨਿਸ਼ਾਨਾ ਬਣਾਇਆ ਗਿਆ ਅਤੇ ਇਸ ਹੱਤਿਆ ਦਾ ਮਕਸਦ ਅਹਿਮਦੀਆ ਭਾਈਚਾਰੇ ਵਿੱਚ ਡਰ ਅਤੇ ਧਾਰਮਿਕ ਨਫ਼ਰਤ ਫੈਲਾਉਣਾ ਸੀ।
ਹਾਲਾਂਕਿ, ਪੁਲਿਸ ਨੇ ਹਾਲੇ ਤੱਕ ਹੱਤਿਆ ਦੇ ਪਿੱਛੇ ਧਾਰਮਿਕ ਕਾਰਨ ਦੀ ਪੁਸ਼ਟੀ ਨਹੀਂ ਕੀਤੀ ਹੈ।
ਪੁਲਿਸ ਕਈ ਪਹਿਲੂਆਂ ਤੋਂ ਕਰ ਰਹੀ ਹੈ ਜਾਂਚ
ਮੰਡੀ ਬਹਾਉੱਦੀਨ ਦੇ ਸਿਟੀ ਪੁਲਿਸ ਸਟੇਸ਼ਨ ਦੇ ਜਾਂਚ ਅਧਿਕਾਰੀ ਅਫ਼ਜ਼ਲ ਅਹਿਮਦ ਨੇ ਦੱਸਿਆ ਕਿ ਅਣਪਛਾਤੇ ਹਮਲਾਵਰਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਮਾਮਲੇ ਦੀ ਜਾਂਚ ਕਈ ਪਹਿਲੂਆਂ ਤੋਂ ਕੀਤੀ ਜਾ ਰਹੀ ਹੈ।
ਪੁਲਿਸ ਨੇ ਸਫ਼ਦਰ ਮਹਮੂਦ ਦੇ ਹਾਲ ਹੀ ਵਿੱਚ ਹੋਏ ਦੂਜੇ ਵਿਆਹ ਅਤੇ ਉਨ੍ਹਾਂ ਦੇ ਕਾਰੋਬਾਰੀ ਮਾਮਲਿਆਂ ਨੂੰ ਵੀ ਜਾਂਚ ਦੇ ਘੇਰੇ ਵਿੱਚ ਰੱਖਿਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਪੜਾਅ ’ਤੇ ਹੱਤਿਆ ਦੇ ਪਿੱਛੇ ਧਾਰਮਿਕ ਮਕਸਦ ਨੂੰ ਨਿਸ਼ਚਿਤ ਤੌਰ ’ਤੇ ਦੱਸਣਾ ਜਲਦਬਾਜ਼ੀ ਹੋਵੇਗੀ।
ਅਹਿਮਦੀਆ ਭਾਈਚਾਰੇ ਖ਼ਿਲਾਫ਼ ਹਿੰਸਾ ਦਾ ਪੁਰਾਣਾ ਮਾਮਲਾ ਵੀ
ਮੰਡੀ ਬਹਾਉੱਦੀਨ ਜ਼ਿਲ੍ਹੇ ਵਿੱਚ ਅਹਿਮਦੀਆ ਭਾਈਚਾਰੇ ਖ਼ਿਲਾਫ਼ ਹਿੰਸਾ ਦਾ ਇਹ ਪਹਿਲਾ ਮਾਮਲਾ ਨਹੀਂ ਹੈ। ਜੂਨ 2024 ਵਿੱਚ ਸਦੁੱਲਾਹਪੁਰ ਇਲਾਕੇ ਵਿੱਚ ਦੋ ਅਹਿਮਦੀਆਂ ਦੀ ਗੋਲੀ ਮਾਰ ਕੇ ਹੱਤਿਆ ਕੀਤੀ ਗਈ ਸੀ।
ਪੁਲਿਸ ਮੁਤਾਬਕ, ਉਸ ਮਾਮਲੇ ਵਿੱਚ ਇੱਕ ਸਥਾਨਕ ਮਦਰਸੇ ਦਾ ਨਾਬਾਲਗ ਵਿਦਿਆਰਥੀ ਮੁਲਜ਼ਮ ਸੀ। ਪੁਲਿਸ ਦਾ ਦਾਅਵਾ ਸੀ ਕਿ ਉਹ ਇੱਕ ਮੌਲਵੀ ਦੇ ਭਾਸ਼ਣ ਤੋਂ ਪ੍ਰਭਾਵਿਤ ਸੀ ਅਤੇ ਅਹਿਮਦੀਆਂ ਨੂੰ ‘ਕਾਫ਼ਿਰ’ ਮੰਨਦਾ ਸੀ। ਇਸ ਮਾਮਲੇ ਦੀ ਸੁਣਵਾਈ ਅਦਾਲਤ ਵਿੱਚ ਜਾਰੀ ਹੈ।
ਭਾਈਚਾਰੇ ਨੇ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਜਤਾਈ
ਅਹਿਮਦੀਆ ਭਾਈਚਾਰੇ ਦੇ ਬੁਲਾਰੇ ਆਮਿਰ ਮਹਮੂਦ ਨੇ 3 ਸਤੰਬਰ ਨੂੰ ਜਾਰੀ ਬਿਆਨ ਵਿੱਚ ਕਿਹਾ ਕਿ ਉਨ੍ਹਾਂ ਦੇ ਮੁਤਾਬਕ ਇਹ ਇਸ ਸਾਲ ਪਾਕਿਸਤਾਨ ਵਿੱਚ ਕਿਸੇ ਅਹਿਮਦੀ ਦੀ ਧਾਰਮਿਕ ਪਛਾਣ ਦੇ ਆਧਾਰ ’ਤੇ ਹੱਤਿਆ ਦਾ ਪਹਿਲਾ ਰਿਪੋਰਟ ਕੀਤਾ ਗਿਆ ਮਾਮਲਾ ਹੈ।
ਉਨ੍ਹਾਂ ਦੋਸ਼ ਲਗਾਇਆ ਕਿ ਮੰਡੀ ਬਹਾਉੱਦੀਨ ਸਮੇਤ ਪਾਕਿਸਤਾਨ ਦੇ ਕਈ ਹਿੱਸਿਆਂ ਵਿੱਚ ਅਹਿਮਦੀਆਂ ਖ਼ਿਲਾਫ਼ ਨਫ਼ਰਤ ਅਤੇ ਉਕਸਾਵੇ ਦੀ ਮੁਹਿੰਮ ਜਾਰੀ ਹੈ।
ਉੱਥੇ ਹੀ, ਪੰਜਾਬ ਦੀ ਘੱਟਗਿਣਤੀ ਸਲਾਹਕਾਰ ਕੌਂਸਲ ਦੇ ਮੈਂਬਰ ਸੋਹੇਲ ਆਲਮ ਨੇ ਹੱਤਿਆ ਨੂੰ ਮੰਦਭਾਗਾ ਕਰਾਰ ਦਿੰਦਿਆਂ ਪੁਲਿਸ ਤੋਂ ਨਿਰਪੱਖ ਜਾਂਚ, ਹੱਤਿਆਰੇ ਦੀ ਜਲਦ ਗ੍ਰਿਫ਼ਤਾਰੀ ਅਤੇ ਸੰਵੇਦਨਸ਼ੀਲ ਇਲਾਕਿਆਂ ਵਿੱਚ ਸੁਰੱਖਿਆ ਪ੍ਰਬੰਧ ਮਜ਼ਬੂਤ ਕਰਨ ਦੀ ਅਪੀਲ ਕੀਤੀ।
ਪਾਕਿਸਤਾਨ ਵਿੱਚ ਅਹਿਮਦੀਆ ਭਾਈਚਾਰੇ ਦੀ ਸਥਿਤੀ
ਅਹਿਮਦੀਆ ਭਾਈਚਾਰੇ ਦੀ ਸ਼ੁਰੂਆਤ 19ਵੀਂ ਸਦੀ ਵਿੱਚ ਬ੍ਰਿਟਿਸ਼ ਭਾਰਤ ਵਿੱਚ ਹੋਈ ਸੀ। ਭਾਈਚਾਰਾ ਆਪਣੇ ਆਪ ਨੂੰ ਮੁਸਲਮਾਨ ਮੰਨਦਾ ਹੈ, ਪਰ ਪੈਗੰਬਰ ਮੁਹੰਮਦ ਦੀ ਅੰਤਿਮ ਪੈਗੰਬਰੀ ਸਬੰਧੀ ਇਸ ਦੀਆਂ ਧਾਰਮਿਕ ਮਾਨਤਾਵਾਂ ਮੁੱਖਧਾਰਾ ਇਸਲਾਮ ਤੋਂ ਵੱਖਰੀਆਂ ਹਨ।
ਪਾਕਿਸਤਾਨ ਨੇ 1974 ਵਿੱਚ ਅਹਿਮਦੀਆਂ ਨੂੰ ਗੈਰ-ਮੁਸਲਿਮ ਘੋਸ਼ਿਤ ਕੀਤਾ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਲਈ ਇਸਲਾਮੀ ਸ਼ਬਦਾਵਲੀ ਅਤੇ ਧਾਰਮਿਕ ਪ੍ਰਤੀਕਾਂ ਦੀ ਵਰਤੋਂ ’ਤੇ ਵੀ ਕਾਨੂੰਨੀ ਪਾਬੰਦੀਆਂ ਲਗਾਈਆਂ ਗਈਆਂ।
2023 ਦੀ ਜਨਗਣਨਾ ਅਨੁਸਾਰ ਪਾਕਿਸਤਾਨ ਵਿੱਚ 1,62,684 ਅਹਿਮਦੀ ਦਰਜ ਕੀਤੇ ਗਏ ਸਨ। ਅਹਿਮਦੀਆ ਭਾਈਚਾਰੇ ਦੀ ਸਾਲਾਨਾ ਰਿਪੋਰਟ ਅਨੁਸਾਰ, 2025 ਵਿੱਚ ਧਾਰਮਿਕ ਕਾਰਨਾਂ ਕਰਕੇ ਤਿੰਨ ਅਹਿਮਦੀਆਂ ਦੀ ਹੱਤਿਆ, ਪੁਲਿਸ ਹਿਰਾਸਤ ਵਿੱਚ ਇੱਕ ਮੌਤ ਅਤੇ ਹੱਤਿਆ ਦੇ ਪੰਜ ਯਤਨ ਦਰਜ ਕੀਤੇ ਗਏ ਸਨ।
