ਚੰਡੀਗੜ੍ਹ: ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਸ਼ਹਿਰ ਵਿੱਚ ਜਾਇਦਾਦ ਦੀਆਂ ਕੀਮਤਾਂ ਵਿੱਚ ਵਾਧਾ ਕਰਦਿਆਂ ਨਵੇਂ ਕੁਲੈਕਟਰ ਰੇਟਾਂ ਦਾ ਐਲਾਨ ਕਰ ਦਿੱਤਾ ਹੈ, ਜੋ 1 ਅਪ੍ਰੈਲ 2026 ਤੋਂ ਲਾਗੂ ਹੋਣਗੇ। ਡੀਸੀ ਦਫ਼ਤਰ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਰਿਹਾਇਸ਼ੀ, ਵਪਾਰਕ, ਉਦਯੋਗਿਕ ਅਤੇ ਖੇਤੀਬਾੜੀ ਜ਼ਮੀਨਾਂ ਦੀਆਂ ਦਰਾਂ ਵਿੱਚ 5 ਤੋਂ 7 ਫ਼ੀਸਦੀ ਤੱਕ ਵਾਧਾ ਕੀਤਾ ਗਿਆ ਹੈ। ਡੀਸੀ ਨਿਸ਼ਾਤ ਕੁਮਾਰ ਯਾਦਵ ਨੇ ਦੱਸਿਆ ਕਿ ਸੈਕਟਰ 1 ਤੋਂ 12 ਤੱਕ ਰਿਹਾਇਸ਼ੀ ਜ਼ਮੀਨਾਂ ਦੀਆਂ ਕੀਮਤਾਂ ਸਭ ਤੋਂ ਵੱਧ ਰਹਿਣਗੀਆਂ, ਜਦਕਿ ਬਾਹਰੀ ਸੈਕਟਰਾਂ ਵਿੱਚ ਦਰਾਂ ਕੁਝ ਘੱਟ ਰੱਖੀਆਂ ਗਈਆਂ ਹਨ। ਨਵੇਂ ਰੇਟਾਂ ਮੁਤਾਬਕ ਸੈਕਟਰ 1-12 ਵਿੱਚ ਦਰ ₹1,78,600 ਤੋਂ ਵੱਧ ਕੇ ₹2,37,900 ਪ੍ਰਤੀ ਵਰਗ ਗਜ਼ ਹੋ ਗਈ ਹੈ, ਸੈਕਟਰ 14-37 ਵਿੱਚ ਇਹ ₹1,81,300 ਪ੍ਰਤੀ ਵਰਗ ਗਜ਼ ਤੱਕ ਪਹੁੰਚ ਗਈ ਹੈ ਅਤੇ ਸੈਕਟਰ 38 ਤੋਂ ਅੱਗੇ ₹1,33,200 ਪ੍ਰਤੀ ਵਰਗ ਗਜ਼ ਨਿਰਧਾਰਤ ਕੀਤੀ ਗਈ ਹੈ, ਜਦਕਿ ਕੋਨੇ ਵਾਲੇ ਪਲਾਟਾਂ ਲਈ 5 ਫ਼ੀਸਦੀ ਵਾਧੂ ਫੀਸ ਵੀ ਦੇਣੀ ਪਵੇਗੀ।
ਚੰਡੀਗੜ੍ਹ ਹਾਊਸਿੰਗ ਬੋਰਡ ਦੇ ਫਲੈਟਾਂ ਲਈ ਵੀ ਮੰਜ਼ਿਲ ਅਨੁਸਾਰ ਨਵੀਆਂ ਦਰਾਂ ਤੈਅ ਕੀਤੀਆਂ ਗਈਆਂ ਹਨ, ਜਿੱਥੇ ਗਰਾਊਂਡ ਫਲੋਰ ₹11,100 ਪ੍ਰਤੀ ਵਰਗ ਫੁੱਟ ਤੱਕ, ਪਹਿਲੀ ਮੰਜ਼ਿਲ ₹11,400, ਦੂਜੀ ₹10,300 ਅਤੇ ਉੱਪਰੀ ਮੰਜ਼ਿਲਾਂ ₹8,700 ਪ੍ਰਤੀ ਵਰਗ ਫੁੱਟ ਤੱਕ ਪਹੁੰਚ ਗਈਆਂ ਹਨ, ਜਦਕਿ ਮਨੀਮਾਜਰਾ ਇਲਾਕੇ ਵਿੱਚ ਇਹ ਦਰ ₹16,700 ਪ੍ਰਤੀ ਵਰਗ ਫੁੱਟ ਹੈ। ਵਪਾਰਕ ਖੇਤਰਾਂ ਵਿੱਚ ਵੀ ਵੱਡਾ ਵਾਧਾ ਕੀਤਾ ਗਿਆ ਹੈ, ਜਿੱਥੇ ਸੈਕਟਰ-17 ਵਿੱਚ SCO ਅਤੇ SCF ਦੀਆਂ ਕੀਮਤਾਂ ₹5,92,200 ਪ੍ਰਤੀ ਵਰਗ ਗਜ਼ ਤੱਕ ਪਹੁੰਚ ਗਈਆਂ ਹਨ, ਉਦਯੋਗਿਕ ਖੇਤਰ ਫੇਜ਼-1 ਅਤੇ 2 ਲਈ ₹86,000 ਪ੍ਰਤੀ ਵਰਗ ਗਜ਼ ਦਰ ਨਿਰਧਾਰਤ ਕੀਤੀ ਗਈ ਹੈ, ਜਦਕਿ ਫੇਜ਼-3 ਦੀਆਂ ਦਰਾਂ ₹62,600 ‘ਤੇ ਹੀ ਕਾਇਮ ਹਨ। Elante Mall ਅਤੇ ਨੇੜਲੇ ਦਫ਼ਤਰਾਂ ਲਈ ਗਰਾਊਂਡ ਫਲੋਰ ਦੀ ਦਰ ₹50,900 ਪ੍ਰਤੀ ਵਰਗ ਫੁੱਟ ਰੱਖੀ ਗਈ ਹੈ, ਜਿਸ ਨਾਲ ਸਪੱਸ਼ਟ ਹੈ ਕਿ ਸ਼ਹਿਰ ਦੇ ਪੌਸ਼ ਇਲਾਕਿਆਂ ਵਿੱਚ ਜਾਇਦਾਦ ਦੀਆਂ ਕੀਮਤਾਂ ਵਿੱਚ ਖਾਸਾ ਉਛਾਲ ਆਇਆ ਹੈ।
