ਮੁੰਬਈ: ਬਾਲੀਵੁੱਡ ਅਤੇ ਭਾਰਤੀ ਸੰਗੀਤ ਜਗਤ ਲਈ ਬੀਤੀ ਸ਼ਾਮ ਇੱਕ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ, ਜਦੋਂ ਦੇਸ਼ ਦੇ ਸਭ ਤੋਂ ਲੋਕਪ੍ਰਿਯ ਅਤੇ ਪ੍ਰਭਾਵਸ਼ਾਲੀ ਪਲੇਬੈਕ ਗਾਇਕ ਅਰਿਜੀਤ ਸਿੰਘ ਨੇ ਐਲਾਨ ਕੀਤਾ ਕਿ ਉਹ ਹੁਣ ਕੋਈ ਵੀ ਨਵਾਂ ਬਾਲੀਵੁੱਡ ਪਲੇਬੈਕ ਗਾਇਕੀ ਦਾ ਕੰਮ ਨਹੀਂ ਲੈਣਗੇ। ਉਨ੍ਹਾਂ ਦੇ ਇਸ ਫੈਸਲੇ ਨਾਲ ਪ੍ਰਸ਼ੰਸਕਾਂ ਅਤੇ ਸੰਗੀਤ ਉਦਯੋਗ ਵਿੱਚ ਭਾਵਨਾਤਮਕ ਹਲਚਲ ਮਚ ਗਈ ਹੈ।
ਅਰਿਜੀਤ ਸਿੰਘ ਨੇ ਆਪਣੀ ਇੰਸਟਾਗ੍ਰਾਮ ਪੋਸਟ ਰਾਹੀਂ ਲਿਖਿਆ ਕਿ ਉਹ ਸਾਲਾਂ ਤੋਂ ਮਿਲਦੇ ਆ ਰਹੇ ਪਿਆਰ ਲਈ ਆਪਣੇ ਪ੍ਰਸ਼ੰਸਕਾਂ ਦਾ ਧੰਨਵਾਦ ਕਰਦੇ ਹਨ ਅਤੇ ਹੁਣ ਪਲੇਬੈਕ ਗਾਇਕ ਵਜੋਂ ਆਪਣਾ ਸਫ਼ਰ ਇਥੇ ਸਮਾਪਤ ਕਰ ਰਹੇ ਹਨ। ਉਨ੍ਹਾਂ ਨੇ ਇਸ ਯਾਤਰਾ ਨੂੰ “ਸ਼ਾਨਦਾਰ” ਕਰਾਰ ਦਿੱਤਾ।
ਹਾਲਾਂਕਿ, ਅਰਿਜੀਤ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਹ ਸੰਗੀਤ ਤੋਂ ਪੂਰੀ ਤਰ੍ਹਾਂ ਦੂਰ ਨਹੀਂ ਜਾ ਰਹੇ। ਉਹ ਆਪਣੇ ਨਿੱਜੀ ਅਤੇ ਸੁਤੰਤਰ ਸੰਗੀਤ ਪ੍ਰੋਜੈਕਟਾਂ ‘ਤੇ ਕੰਮ ਕਰਦੇ ਰਹਿਣਗੇ ਅਤੇ ਪਹਿਲਾਂ ਤੋਂ ਰਿਕਾਰਡ ਕੀਤੇ ਕੁਝ ਗੀਤ 2026 ਵਿੱਚ ਰਿਲੀਜ਼ ਹੋ ਸਕਦੇ ਹਨ। ਪਰ ਹੁਣ ਉਹ ਕੋਈ ਵੀ ਨਵਾਂ ਬਾਲੀਵੁੱਡ ਪਲੇਬੈਕ ਪ੍ਰੋਜੈਕਟ ਸਵੀਕਾਰ ਨਹੀਂ ਕਰਨਗੇ।
ਇਸ ਐਲਾਨ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਪ੍ਰਸ਼ੰਸਕਾਂ ਦੀਆਂ ਭਾਵਨਾਵਾਂ ਫੂਟ ਪਈਆਂ। ਕਈ ਲੋਕਾਂ ਨੇ ਇਸਨੂੰ ਬਾਲੀਵੁੱਡ ਸੰਗੀਤ ਲਈ ਵੱਡਾ ਨੁਕਸਾਨ ਦੱਸਿਆ, ਜਦਕਿ ਹੋਰਾਂ ਨੇ ਅਰਿਜੀਤ ਸਿੰਘ ਨੂੰ ਉਨ੍ਹਾਂ ਦੇ ਨਵੇਂ ਕਲਾਤਮਕ ਸਫ਼ਰ ਲਈ ਸ਼ੁੱਭਕਾਮਨਾਵਾਂ ਦਿੱਤੀਆਂ।
ਜ਼ਿਕਰਯੋਗ ਹੈ ਕਿ ਅਰਿਜੀਤ ਸਿੰਘ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ 2005 ਵਿੱਚ ਰਿਐਲਿਟੀ ਸ਼ੋਅ ‘ਫੇਮ ਗੁਰੂਕੁਲ’ ਨਾਲ ਕੀਤੀ ਸੀ। 2011 ਵਿੱਚ ਫਿਲਮ ‘ਮਰਡਰ 2’ ਨਾਲ ਪਲੇਬੈਕ ਡੈਬਿਊ ਕਰਨ ਤੋਂ ਬਾਅਦ, 2013 ਵਿੱਚ ‘ਆਸ਼ਿਕੀ 2’ ਦੇ ਸੁਪਰਹਿੱਟ ਗੀਤ “ਤੁਮ ਹੀ ਹੋ” ਨੇ ਉਨ੍ਹਾਂ ਨੂੰ ਸੰਗੀਤ ਜਗਤ ਦਾ ਸੂਪਰਸਟਾਰ ਬਣਾ ਦਿੱਤਾ। “ਚੰਨਾ ਮੇਰਿਆ,” “ਕੇਸਰੀਆ,” “ਏ ਦਿਲ ਹੈ ਮੁਸ਼ਕਲ,” ਅਤੇ “ਹਵਾਏਂ” ਵਰਗੇ ਗੀਤ ਅੱਜ ਵੀ ਲੋਕਾਂ ਦੇ ਦਿਲਾਂ ‘ਚ ਵੱਸਦੇ ਹਨ।
