ਮਾਸਕੋ/ਰੂਸ: Russia ਨੇ ਦੁਨੀਆ ਦੀ ਪ੍ਰਸਿੱਧ ਮੈਸੇਜਿੰਗ ਐਪ WhatsApp ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਰੂਸੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਮਰੀਕੀ ਟੈਕ ਕੰਪਨੀ Meta ਦਾ WhatsApp ਰੂਸੀ ਕਾਨੂੰਨਾਂ ਦੀ ਉਲੰਘਣਾ ਕਰ ਰਿਹਾ ਸੀ, ਜਿਸ ਕਾਰਨ ਇਸਨੂੰ ਪੂਰੀ ਤਰ੍ਹਾਂ ਬਲੌਕ ਕਰ ਦਿੱਤਾ ਗਿਆ ਹੈ। ਸਰਕਾਰ ਨੇ ਨਾਗਰਿਕਾਂ ਨੂੰ ਦੇਸੀ ਐਪ MAX ਦੀ ਵਰਤੋਂ ਕਰਨ ਲਈ ਕਿਹਾ ਹੈ।
ਇਸ ਤੋਂ ਪਹਿਲਾਂ WhatsApp ਨੇ ਦਾਅਵਾ ਕੀਤਾ ਸੀ ਕਿ ਰੂਸੀ ਅਧਿਕਾਰੀਆਂ ਐਪ ਦੀ ਪਹੁੰਚ ਨੂੰ ਸੀਮਿਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਹ ਮਾਮਲਾ ਉਸ ਵੇਲੇ ਹੋਰ ਚਰਚਾ ਵਿੱਚ ਆਇਆ ਜਦੋਂ Telegram ਦੇ ਸੰਸਥਾਪਕ Pavel Durov ਨੇ ਵੀ ਮਾਸਕੋ ‘ਤੇ ਆਪਣੇ ਪਲੇਟਫਾਰਮ ਦੀ ਪਹੁੰਚ ਰੋਕਣ ਦੇ ਆਰੋਪ ਲਗਾਏ।
ਰੂਸੀ ਬੁਲਾਰੇ Dmitry Peskov ਨੇ ਮੀਡੀਆ ਨੂੰ ਦੱਸਿਆ ਕਿ Meta ਵੱਲੋਂ ਕਾਨੂੰਨੀ ਪਾਲਣਾ ਨਾ ਕਰਨ ਕਰਕੇ ਇਹ ਪਾਬੰਦੀ ਲਗਾਈ ਗਈ ਹੈ। ਉਨ੍ਹਾਂ ਨੇ ਲੋਕਾਂ ਨੂੰ ਸਥਾਨਕ ਪਲੇਟਫਾਰਮ MAX ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ।
WhatsApp ਨੇ ਇਸ ਕਦਮ ‘ਤੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ। ਕੰਪਨੀ ਨੇ ਦੋਸ਼ ਲਗਾਇਆ ਕਿ ਰੂਸੀ ਸਰਕਾਰ ਆਪਣੇ ਨਾਗਰਿਕਾਂ ਨੂੰ ਸਰਕਾਰੀ ਨਿਗਰਾਨੀ ਵਾਲੀ ਐਪ ਦੀ ਵਰਤੋਂ ਲਈ ਮਜਬੂਰ ਕਰ ਰਹੀ ਹੈ। ਕੰਪਨੀ ਅਨੁਸਾਰ, 10 ਕਰੋੜ ਤੋਂ ਵੱਧ ਰੂਸੀ ਯੂਜ਼ਰਾਂ ਨੂੰ ਐਂਡ-ਟੂ-ਐਂਡ ਇਨਕ੍ਰਿਪਸ਼ਨ ਵਾਲੀ ਸੁਰੱਖਿਅਤ ਸੇਵਾ ਤੋਂ ਵਾਂਝਾ ਕੀਤਾ ਜਾ ਰਿਹਾ ਹੈ।
ਇਹ ਫੈਸਲਾ ਉਸ ਸਮੇਂ ਆਇਆ ਹੈ ਜਦੋਂ Ukraine ਜੰਗ ਨੂੰ ਲੈ ਕੇ ਅਮਰੀਕਾ ਵੱਲੋਂ ਰੂਸ ‘ਤੇ ਦਬਾਅ ਵਧਾਇਆ ਜਾ ਰਿਹਾ ਹੈ। ਰੂਸ ਆਪਣੇ ‘ਸੰਪ੍ਰਭੂ ਕਮਿਊਨੀਕੇਸ਼ਨ ਇਨਫਰਾਸਟਰੱਕਚਰ’ ਨੂੰ ਮਜ਼ਬੂਤ ਕਰਨ ਲਈ ਦੇਸੀ ਟੈਕ ਪਲੇਟਫਾਰਮਾਂ ਨੂੰ ਤਰਜੀਹ ਦੇ ਰਿਹਾ ਹੈ।
MAX ਨੂੰ 2025 ਵਿੱਚ ਅਧਿਕਾਰਤ ਤੌਰ ‘ਤੇ ਲਾਂਚ ਕੀਤਾ ਗਿਆ। ਇਹ ਘਰੇਲੂ ਮੈਸੇਜਿੰਗ ਐਪ ਹੋਣ ਦੇ ਨਾਲ ਇੱਕ ਸੁਪਰ ਐਪ ਵਜੋਂ ਤਿਆਰ ਕੀਤੀ ਗਈ ਹੈ। MAX ਨੂੰ ਚੀਨ ਦੀ ਮਸ਼ਹੂਰ ਐਪ WeChat ਦੇ ਮਾਡਲ ਅਨੁਸਾਰ ਬਣਾਇਆ ਗਿਆ ਹੈ। ਇਸ ਵਿੱਚ ਮੈਸੇਜਿੰਗ, ਵਾਇਸ/ਵੀਡੀਓ ਕਾਲਾਂ, ਸੋਸ਼ਲ ਮੀਡੀਆ, ਡਿਜੀਟਲ ਆਈਡੀ ਅਤੇ ਇਲੈਕਟ੍ਰਾਨਿਕ ਦਸਤਖਤ ਵਰਗੀਆਂ ਸੇਵਾਵਾਂ ਇਕੱਠਿਆਂ ਮਿਲਦੀਆਂ ਹਨ।
MAX ਰਾਹੀਂ ਨਾਗਰਿਕ Gosuslugi ਵਰਗੀਆਂ ਸਰਕਾਰੀ ਸੇਵਾਵਾਂ ਦੀ ਪਹੁੰਚ ਹਾਸਲ ਕਰ ਸਕਦੇ ਹਨ। ਸਤੰਬਰ 2025 ਤੋਂ ਰੂਸ ਵਿੱਚ ਵੇਚੇ ਜਾਣ ਵਾਲੇ ਨਵੇਂ ਸਮਾਰਟਫੋਨਾਂ ‘ਤੇ MAX ਐਪ ਪਹਿਲਾਂ ਤੋਂ ਇੰਸਟਾਲ ਹੋਣਾ ਲਾਜ਼ਮੀ ਹੋਵੇਗਾ। ਰੂਸ ਦਾ ਇਹ ਕਦਮ ਦੇਸੀ ਟੈਕਨੋਲੋਜੀ ਨੂੰ ਵਧਾਵਾ ਦੇਣ ਅਤੇ ਵਿਦੇਸ਼ੀ ਕੰਪਨੀਆਂ ‘ਤੇ ਨਿਰਭਰਤਾ ਘਟਾਉਣ ਵੱਲ ਇਕ ਵੱਡਾ ਫੈਸਲਾ ਮੰਨਿਆ ਜਾ ਰਿਹਾ ਹੈ।
