ਜੰਮੂ: ਦੱਖਣੀ ਕਸ਼ਮੀਰ ਵਿੱਚ ਸਥਿਤ ਪਵਿੱਤਰ ਅਮਰਨਾਥ ਗੁਫਾ ਦੇ ਦਰਸ਼ਨਾਂ ਲਈ ਚੱਲ ਰਹੀ ਸਾਲਾਨਾ ਅਮਰਨਾਥ ਯਾਤਰਾ ਦੌਰਾਨ 5,335 ਸ਼ਰਧਾਲੂਆਂ ਦਾ ਇੱਕ ਹੋਰ ਜੱਥਾ ਜੰਮੂ ਦੇ ਭਗਵਤੀ ਨਗਰ ਬੇਸ ਕੈਂਪ ਤੋਂ ਰਵਾਨਾ ਹੋਇਆ। ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਹੇਠ ਸ਼ਰਧਾਲੂ 232 ਹਲਕੇ ਅਤੇ ਭਾਰੀ ਵਾਹਨਾਂ ਦੇ ਕਾਫ਼ਲੇ ਵਿੱਚ ਬਾਲਟਾਲ ਅਤੇ ਪਹਿਲਗਾਮ ਬੇਸ ਕੈਂਪਾਂ ਵੱਲ ਰਵਾਨਾ ਹੋਏ।
ਜਾਣਕਾਰੀ ਅਨੁਸਾਰ ਕੁੱਲ ਸ਼ਰਧਾਲੂਆਂ ਵਿੱਚੋਂ 1,736 ਯਾਤਰੀਆਂ ਨੇ ਛੋਟੇ ਬਾਲਟਾਲ ਮਾਰਗ ਨੂੰ ਚੁਣਿਆ, ਜਦਕਿ 3,599 ਸ਼ਰਧਾਲੂ ਰਵਾਇਤੀ ਪਹਿਲਗਾਮ ਮਾਰਗ ਰਾਹੀਂ ਪਵਿੱਤਰ ਗੁਫਾ ਵੱਲ ਅੱਗੇ ਵਧੇ। ਬਾਲਟਾਲ ਜਾਣ ਵਾਲੇ ਸ਼ਰਧਾਲੂ 99 ਵਾਹਨਾਂ ਵਿੱਚ ਸਵਾਰ ਸਨ। ਇਸ ਜੱਥੇ ਵਿੱਚ 1,219 ਪੁਰਸ਼, 512 ਔਰਤਾਂ ਅਤੇ 5 ਬੱਚੇ ਸ਼ਾਮਲ ਸਨ।
ਇਸੇ ਤਰ੍ਹਾਂ ਪਹਿਲਗਾਮ ਬੇਸ ਕੈਂਪ ਲਈ 133 ਵਾਹਨਾਂ ਵਿੱਚ 3,599 ਸ਼ਰਧਾਲੂ ਰਵਾਨਾ ਹੋਏ। ਇਸ ਜੱਥੇ ਵਿੱਚ 2,692 ਪੁਰਸ਼, 776 ਔਰਤਾਂ, 16 ਬੱਚੇ, 90 ਸਾਧੂ, 24 ਸਾਧਵੀਆਂ ਅਤੇ ਇੱਕ ਕਿੰਨਰ ਸ਼ਰਧਾਲੂ ਸ਼ਾਮਲ ਸੀ।
ਬਾਲਟਾਲ ਮਾਰਗ ਲਈ ਵਾਹਨਾਂ ਦਾ ਕਾਫ਼ਲਾ ਸਵੇਰੇ 2:42 ਵਜੇ ਭਗਵਤੀ ਨਗਰ ਬੇਸ ਕੈਂਪ ਤੋਂ ਰਵਾਨਾ ਹੋਇਆ, ਜਦਕਿ ਪਹਿਲਗਾਮ ਮਾਰਗ ਲਈ ਸ਼ਰਧਾਲੂਆਂ ਦਾ ਕਾਫ਼ਲਾ ਸਵੇਰੇ 3:10 ਵਜੇ ਰਵਾਨਾ ਕੀਤਾ ਗਿਆ। ਯਾਤਰਾ ਨੂੰ ਸੁਚਾਰੂ ਅਤੇ ਸੁਰੱਖਿਅਤ ਢੰਗ ਨਾਲ ਜਾਰੀ ਰੱਖਣ ਲਈ ਪ੍ਰਸ਼ਾਸਨ ਅਤੇ ਸੁਰੱਖਿਆ ਏਜੰਸੀਆਂ ਵੱਲੋਂ ਰਸਤੇ ਵਿੱਚ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ।
