ਗੁਜਰਾਤ ਸਰਕਾਰ ਨੇ 2026-27 ਲਈ ਸਿਹਤ ਅਤੇ ਪਰਿਵਾਰ ਭਲਾਈ ਵਿਭਾਗ ਦਾ ₹25,403 ਕਰੋੜ ਤੋਂ ਵੱਧ ਦਾ ਬਜਟ ਮਨਜ਼ੂਰ ਕਰਕੇ ਸੂਬੇ ਦੇ ਸਿਹਤ ਢਾਂਚੇ ਨੂੰ ਮਜ਼ਬੂਤ ਕਰਨ ਵੱਲ ਵੱਡਾ ਕਦਮ ਚੁੱਕਿਆ ਹੈ। ਇਹ ਬਜਟ ਪਿਛਲੇ ਸਾਲ ਨਾਲੋਂ ਲਗਭਗ 8.6% ਵੱਧ ਹੈ।
ਸਰਕਾਰ ਦਾ ਧਿਆਨ ਦੂਰਦਰਾਜ਼ ਖੇਤਰਾਂ ਤੱਕ ਬਿਹਤਰ ਸਿਹਤ ਸੇਵਾਵਾਂ ਪਹੁੰਚਾਉਣ, ਮਾਤਾ ਅਤੇ ਬੱਚੇ ਦੀ ਸਿਹਤ ਨੂੰ ਮਜ਼ਬੂਤ ਕਰਨ ਅਤੇ ਆਧੁਨਿਕ ਮੈਡੀਕਲ ਢਾਂਚਾ ਤਿਆਰ ਕਰਨ ‘ਤੇ ਹੈ।
ਰਾਜ ਭਰ ਵਿੱਚ ਹਜ਼ਾਰਾਂ ਸਬ-ਹੈਲਥ ਸੈਂਟਰ ਅਤੇ ਪ੍ਰਾਇਮਰੀ ਹੈਲਥ ਸੈਂਟਰ ਪਹਿਲਾਂ ਹੀ ਚੱਲ ਰਹੇ ਹਨ, ਜਿਨ੍ਹਾਂ ਨੂੰ ਹੋਰ ਸੁਧਾਰਿਆ ਜਾਵੇਗਾ। ਮੁਫ਼ਤ ਟੈਸਟ ਸਹੂਲਤਾਂ ਦਾ ਵਿਸਥਾਰ, ਮੋਬਾਈਲ ਹੈਲਥ ਯੂਨਿਟਾਂ ਦੀ ਸੇਵਾ ਅਤੇ ਐਂਬੂਲੈਂਸ ਨੈੱਟਵਰਕ ਨੂੰ ਵੀ ਮਜ਼ਬੂਤ ਕੀਤਾ ਜਾ ਰਿਹਾ ਹੈ।
ਮਹਿਲਾਵਾਂ ਲਈ ਖਾਸ ਯੋਜਨਾਵਾਂ ਹੇਠ ਆਰਥਿਕ ਮਦਦ ਵਧਾਈ ਗਈ ਹੈ, ਜਦਕਿ ਗਰੀਬ ਪਰਿਵਾਰਾਂ ਲਈ ਇਲਾਜ ਦੀ ਸੀਮਾ ਵੀ ਵਧਾ ਕੇ ₹10 ਲੱਖ ਕਰ ਦਿੱਤੀ ਗਈ ਹੈ।
ਇਸ ਤੋਂ ਇਲਾਵਾ, ਨਵੇਂ ਮੈਡੀਕਲ ਕਾਲਜ, ਵੱਡੇ ਹਸਪਤਾਲ ਪ੍ਰੋਜੈਕਟ (ਮੇਡੀਸਿਟੀ), ਕੈਂਸਰ ਅਤੇ ਕਿਡਨੀ ਇਲਾਜ ਕੇਂਦਰ ਅਤੇ ਨਵਜਾਤ ਬੱਚਿਆਂ ਲਈ ਖਾਸ ਯੂਨਿਟ ਬਣਾਉਣ ਦੀ ਯੋਜਨਾ ਵੀ ਸ਼ਾਮਲ ਹੈ।
ਇਸ ਬਜਟ ਨਾਲ ਨਾ ਸਿਰਫ਼ ਸਿਹਤ ਸੇਵਾਵਾਂ ਵਿੱਚ ਸੁਧਾਰ ਆਵੇਗਾ, ਸਗੋਂ ਮੈਡੀਕਲ ਟੂਰਿਜ਼ਮ ਅਤੇ ਰੋਜ਼ਗਾਰ ਦੇ ਮੌਕੇ ਵੀ ਵਧਣ ਦੀ ਉਮੀਦ ਹੈ।
