ਮੁੰਬਈ: ਮਰਾਠੀ ਅਤੇ ਹਿੰਦੀ ਮਨੋਰੰਜਨ ਜਗਤ ਦੀ ਮਸ਼ਹੂਰ ਅਦਾਕਾਰਾ ਪ੍ਰਵੀਨਾ ਦੇਸ਼ਪਾਂਡੇ ਦਾ 17 ਫਰਵਰੀ 2026 ਨੂੰ 60 ਸਾਲ ਦੀ ਉਮਰ ਵਿੱਚ ਮਲਟੀਪਲ ਮਾਇਲੋਮਾ (ਬਲੱਡ ਕੈਂਸਰ) ਨਾਲ ਲੰਬੀ ਲੜਾਈ ਤੋਂ ਬਾਅਦ ਦੇਹਾਂਤ ਹੋ ਗਿਆ। ਉਹ 2019 ਤੋਂ ਇਸ ਬੀਮਾਰੀ ਦਾ ਇਲਾਜ ਕਰਵਾ ਰਹੀ ਸੀ।
ਪਰਿਵਾਰ ਵੱਲੋਂ ਸੋਸ਼ਲ ਮੀਡੀਆ ‘ਤੇ ਇਹ ਦੁਖਦਾਈ ਖ਼ਬਰ ਸਾਂਝੀ ਕੀਤੀ ਗਈ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਮੁੰਬਈ ਦੇ ਅੰਧੇਰੀ ਪੂਰਬ ਸਥਿਤ ਚੱਕਾਲਾ ਪਾਰਸੀਵਾੜਾ ਦੇ ਇੱਕ ਹਿੰਦੂ ਸ਼ਮਸ਼ਾਨਘਾਟ ਵਿੱਚ ਦੁਪਹਿਰ 3 ਵਜੇ ਕੀਤਾ ਗਿਆ। ਉਨ੍ਹਾਂ ਦੇ ਜਾਣ ਨਾਲ ਮਰਾਠੀ ਅਤੇ ਹਿੰਦੀ ਫਿਲਮ ਉਦਯੋਗ ਨੂੰ ਵੱਡਾ ਨੁਕਸਾਨ ਪਹੁੰਚਿਆ ਹੈ।
ਪ੍ਰਵੀਨਾ ਦੇਸ਼ਪਾਂਡੇ ਆਪਣੇ ਮਜ਼ਬੂਤ ਸਪੋਰਟਿੰਗ ਰੋਲ ਲਈ ਜਾਣੀਆਂ ਜਾਂਦੀਆਂ ਸਨ। ਭਾਵੇਂ ਉਹ ਘੱਟ ਹੀ ਮੁੱਖ ਨਾਇਕਾ ਵਜੋਂ ਨਜ਼ਰ ਆਈਆਂ, ਪਰ ਉਨ੍ਹਾਂ ਦੀ ਅਦਾਕਾਰੀ ਦੀ ਡੂੰਘਾਈ ਅਤੇ ਇਮਾਨਦਾਰੀ ਨੇ ਦਰਸ਼ਕਾਂ ਦੇ ਦਿਲ ਜਿੱਤ ਲਏ।
ਉਨ੍ਹਾਂ ਨੂੰ ਖ਼ਾਸ ਪਛਾਣ ਸਲਮਾਨ ਖਾਨ ਦੀ 2011 ਦੀ ਹਿੱਟ ਫ਼ਿਲਮ Ready ਵਿੱਚ ਸ਼ਾਲੂ ਚੌਧਰੀ ਦੇ ਕਿਰਦਾਰ ਨਾਲ ਮਿਲੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਜੌਨ ਅਬ੍ਰਾਹਮ ਨਾਲ ਫ਼ਿਲਮ Parmanu, Ek Villain ਅਤੇ Jalebi ਵਿੱਚ ਵੀ ਅਹਿਮ ਭੂਮਿਕਾਵਾਂ ਨਿਭਾਈਆਂ।
ਟੀਵੀ ਦਰਸ਼ਕਾਂ ਲਈ ਉਹ “ਘਰ ਏਕ ਮੰਦਰ,” “ਕੁਮਕੁਮ,” “ਕਰਮ ਅਪਨਾ ਅਪਨਾ,” ਅਤੇ Kulfi Kumar Bajewala ਵਰਗੇ ਮਸ਼ਹੂਰ ਸ਼ੋਅਜ਼ ਰਾਹੀਂ ਘਰ-ਘਰ ਵਿੱਚ ਜਾਣੀ-ਪਹਿਚਾਣੀ ਸ਼ਖ਼ਸੀਅਤ ਬਣ ਗਈਆਂ। ਪਰਿਵਾਰਕ ਕਿਰਦਾਰਾਂ ਵਿੱਚ ਉਨ੍ਹਾਂ ਦੀ ਸਹਜ ਅਦਾਕਾਰੀ ਨੂੰ ਖਾਸ ਪਸੰਦ ਕੀਤਾ ਗਿਆ।
ਪ੍ਰਵੀਨਾ ਨੇ ਹਾਲ ਹੀ ਵਿੱਚ ਕ੍ਰਾਈਮ ਥ੍ਰਿਲਰ ਵੈੱਬ ਸੀਰੀਜ਼ The Family Man ਦੇ ਸੀਜ਼ਨ 3 ਦੀ ਸ਼ੂਟਿੰਗ ਪੂਰੀ ਕੀਤੀ ਸੀ, ਜਿਸ ਵਿੱਚ ਉਨ੍ਹਾਂ ਨੇ ਮਨੋਜ ਬਾਜਪਾਈ ਦੇ ਕਿਰਦਾਰ ਦੀ ਮਾਂ ਦੀ ਭੂਮਿਕਾ ਨਿਭਾਈ। ਅਦਾਕਾਰੀ ਵਿੱਚ ਆਉਣ ਤੋਂ ਪਹਿਲਾਂ ਉਹ ਥੀਏਟਰ ਨਾਲ ਜੁੜੀਆਂ ਰਹੀਆਂ। ਉਨ੍ਹਾਂ ਦਾ ਯੋਗਦਾਨ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ।
