ਫਿਰੋਜ਼ਪੁਰ: ਰੇਲਵੇ ਵਿਭਾਗ ਨੇ ਨੌਂ ਰੇਲਗੱਡੀਆਂ ਦੀ ਸੋਧੀ ਹੋਈ ਸਮਾਂ-ਸਾਰਣੀ ਜਾਰੀ ਕਰਦਿਆਂ ਉਨ੍ਹਾਂ ਦੇ ਸਟਾਪੇਜ ਅਤੇ ਸਮੇਂ ਵਿੱਚ ਮਾਮੂਲੀ ਬਦਲਾਅ ਕੀਤੇ ਹਨ। ਵਿਭਾਗ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਇਨ੍ਹਾਂ ਤਬਦੀਲੀਆਂ ਦਾ ਅਸਰ ਯਾਤਰੀਆਂ ਦੀ ਯਾਤਰਾ ’ਤੇ ਪਵੇਗਾ।
ਨਵੀਂ ਸਮਾਂ-ਸਾਰਣੀ ਅਨੁਸਾਰ ਜੰਮੂ ਤਵੀ-ਪੁਣੇ ਜੇਹਲਮ ਐਕਸਪ੍ਰੈਸ, ਜੰਮੂ ਤਵੀ-ਬਾੜਮੇਰ ਸ਼ਾਲੀਮਾਰ ਮਲਾਨੀ ਐਕਸਪ੍ਰੈਸ, ਜੰਮੂ ਤਵੀ-ਹਾਵੜਾ ਹਿਮਗਿਰੀ ਐਕਸਪ੍ਰੈਸ, ਜੰਮੂ ਤਵੀ-ਭਾਗਲਪੁਰ ਅਮਰਨਾਥ ਐਕਸਪ੍ਰੈਸ, ਜੰਮੂ ਤਵੀ-ਗੁਹਾਟੀ ਅਮਰਨਾਥ ਐਕਸਪ੍ਰੈਸ, ਜੰਮੂ ਤਵੀ-ਗੋਰਖਪੁਰ ਐਕਸਪ੍ਰੈਸ ਅਤੇ ਸ੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ-ਨਵੀਂ ਦਿੱਲੀ ਉੱਤਰ ਸੰਪਰਕ ਕ੍ਰਾਂਤੀ ਐਕਸਪ੍ਰੈਸ ਦੇ ਸਟਾਪੇਜ ਵਿੱਚ ਬਦਲਾਅ ਕੀਤੇ ਗਏ ਹਨ।
ਇਨ੍ਹਾਂ ਤਬਦੀਲੀਆਂ ਦੇ ਚਲਦਿਆਂ ਸਬੰਧਤ ਰੇਲਗੱਡੀਆਂ ਦੇ ਆਉਣ ਅਤੇ ਰਵਾਨਗੀ ਦੇ ਸਮੇਂ ਵਿੱਚ ਵੀ ਬਦਲਾਅ ਕੀਤਾ ਗਿਆ ਹੈ। ਰੇਲਵੇ ਵਿਭਾਗ ਨੇ ਯਾਤਰੀਆਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਯਾਤਰਾ ਕਰਨ ਤੋਂ ਪਹਿਲਾਂ ਸਬੰਧਤ ਸਟੇਸ਼ਨ ’ਤੇ ਰੇਲਗੱਡੀ ਦੇ ਨਵੇਂ ਆਉਣ ਅਤੇ ਜਾਣ ਦੇ ਸਮੇਂ ਦੀ ਪੁਸ਼ਟੀ ਜ਼ਰੂਰ ਕਰ ਲੈਣ।
ਇਸ ਤੋਂ ਇਲਾਵਾ, ਕਾਦੀਆਂ-ਅੰਮ੍ਰਿਤਸਰ ਯਾਤਰੀ ਰੇਲਗੱਡੀ ਨੰਬਰ 74692 ਦੀ ਸਮਾਂ-ਸਾਰਣੀ ਵਿੱਚ ਵੀ 25 ਮਿੰਟ ਦਾ ਬਦਲਾਅ ਕੀਤਾ ਗਿਆ ਹੈ। ਯਾਤਰੀਆਂ ਨੂੰ ਨਵੇਂ ਸਮੇਂ ਨੂੰ ਧਿਆਨ ਵਿੱਚ ਰੱਖਦਿਆਂ ਆਪਣੀ ਯਾਤਰਾ ਦੀ ਯੋਜਨਾ ਬਣਾਉਣ ਦੀ ਸਲਾਹ ਦਿੱਤੀ ਗਈ ਹੈ।
