ਖੰਨਾ (ਭੱਟੀਆਂ): ਖੰਨਾ ਦੇ ਪਿੰਡ ਭੱਟੀਆਂ ਸਥਿਤ ਵੇਰਕਾ ਕੈਟਲ ਫੀਡ ਪਲਾਂਟ ਵਿੱਚ ਪਸ਼ੂਆਂ ਦੀ ਫੀਡ ਤਿਆਰ ਕਰਨ ਦੌਰਾਨ ਵੱਡੀ ਬੇਨਿਯਮਤਾ ਸਾਹਮਣੇ ਆਈ ਹੈ। ਦੋਸ਼ ਹੈ ਕਿ ਮਹਿੰਗੇ ਟੈਕਨੀਕਲ ਗ੍ਰੇਡ ਯੂਰੀਆ ਦੀ ਥਾਂ ਕਿਸਾਨਾਂ ਲਈ ਸਰਕਾਰੀ ਸਬਸਿਡੀ ‘ਤੇ ਮਿਲਣ ਵਾਲੇ ਨਿੰਮ ਕੋਟਡ ਯੂਰੀਆ ਦੀ ਵਰਤੋਂ ਕੀਤੀ ਜਾ ਰਹੀ ਸੀ। ਮਾਮਲੇ ਦਾ ਖੁਲਾਸਾ ਹੋਣ ਤੋਂ ਬਾਅਦ ਖੰਨਾ ਪੁਲਿਸ ਨੇ ਪਲਾਂਟ ਦੇ ਜ਼ਿੰਮੇਵਾਰ ਅਧਿਕਾਰੀਆਂ ਅਤੇ ਯੂਰੀਆ ਸਪਲਾਈ ਕਰਨ ਵਾਲੀਆਂ ਦੋ ਨਿੱਜੀ ਕੰਪਨੀਆਂ ਖ਼ਿਲਾਫ਼ ਮਿਲੀਭੁਗਤ ਅਤੇ ਸਰਕਾਰ ਨੂੰ ਵਿੱਤੀ ਨੁਕਸਾਨ ਪਹੁੰਚਾਉਣ ਦੇ ਦੋਸ਼ਾਂ ਹੇਠ ਅਪਰਾਧਿਕ ਮਾਮਲਾ ਦਰਜ ਕਰ ਲਿਆ ਹੈ।
ਇਹ ਕਾਰਵਾਈ ਖੇਤੀਬਾੜੀ ਵਿਭਾਗ ਨੂੰ ਮਿਲੀ ਇੱਕ ਗੁਪਤ ਸ਼ਿਕਾਇਤ ਤੋਂ ਬਾਅਦ ਕੀਤੀ ਗਈ। ਮੁੱਖ ਖੇਤੀਬਾੜੀ ਅਫ਼ਸਰ ਗੁਰਦੀਪ ਸਿੰਘ ਦੀ ਅਗਵਾਈ ਹੇਠ ਟੀਮ ਨੇ 17 ਜੂਨ ਨੂੰ ਪਲਾਂਟ ਵਿੱਚ ਅਚਾਨਕ ਛਾਪਾ ਮਾਰਿਆ। ਜਾਂਚ ਦੌਰਾਨ 1,340 ਯੂਰੀਆ ਦੇ ਥੈਲਿਆਂ ‘ਤੇ ਸ਼ੱਕ ਹੋਣ ਕਾਰਨ ਤਿੰਨ ਨਮੂਨੇ ਲੈ ਕੇ ਲੁਧਿਆਣਾ ਦੀ ਖਾਦ ਪਰਖ ਲੈਬਾਰਟਰੀ ਭੇਜੇ ਗਏ।
ਲੈਬ ਰਿਪੋਰਟ ਵਿੱਚ ਪੁਸ਼ਟੀ ਹੋਈ ਕਿ ਸੈਂਪਲਾਂ ਵਿੱਚ ਟੈਕਨੀਕਲ ਗ੍ਰੈਡ ਯੂਰੀਆ ਨਹੀਂ, ਸਗੋਂ ਨਿੰਮ ਕੋਟਡ ਯੂਰੀਆ ਮੌਜੂਦ ਸੀ। ਰਿਪੋਰਟ ਵਿੱਚ ਨੀਮ ਦੇ ਤੇਲ ਦੀ ਮੌਜੂਦਗੀ ਵੀ ਮਿਲੀ, ਜਿਸ ਨਾਲ ਇਹ ਸਾਬਤ ਹੋ ਗਿਆ ਕਿ ਖੇਤੀ ਲਈ ਸਬਸਿਡੀ ਵਾਲਾ ਯੂਰੀਆ ਉਦਯੋਗਿਕ ਵਰਤੋਂ ਲਈ ਵਰਤਿਆ ਜਾ ਰਿਹਾ ਸੀ। ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਟੈਕਨੀਕਲ ਯੂਰੀਆ ਦੇ ਨਾਂ ‘ਤੇ ਰੱਖੇ ਥੈਲਿਆਂ ‘ਤੇ ਨਾ ਤਾਂ ਨਿਰਮਾਣ ਮਿਤੀ, ਨਾ ਲਾਟ ਨੰਬਰ, ਨਾ ਐਮਆਰਪੀ ਅਤੇ ਨਾ ਹੀ ਹੋਰ ਲਾਜ਼ਮੀ ਕਾਨੂੰਨੀ ਜਾਣਕਾਰੀ ਦਰਜ ਸੀ।
ਅਧਿਕਾਰੀਆਂ ਮੁਤਾਬਕ ਸਬਸਿਡੀ ਵਾਲੇ ਖੇਤੀ ਯੂਰੀਆ ਅਤੇ ਕਮਰਸ਼ੀਅਲ ਵਰਤੋਂ ਵਾਲੇ ਟੈਕਨੀਕਲ ਯੂਰੀਆ ਦੀਆਂ ਕੀਮਤਾਂ ਵਿੱਚ ਕਾਫ਼ੀ ਵੱਡਾ ਫ਼ਰਕ ਹੁੰਦਾ ਹੈ। ਦੋਸ਼ ਹੈ ਕਿ ਸਪਲਾਇਰ ਕੰਪਨੀਆਂ ਅਤੇ ਪਲਾਂਟ ਦੇ ਅਧਿਕਾਰੀਆਂ ਨੇ ਸਸਤਾ ਸਬਸਿਡੀ ਵਾਲਾ ਯੂਰੀਆ ਵਰਤ ਕੇ ਸਰਕਾਰ ਦੀ ਸਬਸਿਡੀ ਦਾ ਨਾਜਾਇਜ਼ ਲਾਭ ਲਿਆ ਅਤੇ ਸਰਕਾਰੀ ਖ਼ਜ਼ਾਨੇ ਨੂੰ ਵੱਡਾ ਵਿੱਤੀ ਨੁਕਸਾਨ ਪਹੁੰਚਾਇਆ।
ਖੇਤੀਬਾੜੀ ਵਿਭਾਗ ਦੀ ਸ਼ਿਕਾਇਤ ‘ਤੇ ਪੁਲਿਸ ਨੇ ਖਾਦ (ਕੰਟਰੋਲ) ਆਰਡਰ-1985, ਜ਼ਰੂਰੀ ਵਸਤਾਂ ਐਕਟ-1955 ਅਤੇ ਭਾਰਤੀ ਨਿਆਏ ਸੰਹਿਤਾ (BNS) ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਕੇਸ ਦਰਜ ਕਰਕੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
