ਗਰਮੀਆਂ ਦੇ ਮੌਸਮ ਵਿੱਚ ਕੱਪੜੇ ਜਲਦੀ ਸੁਕਾਉਣ ਲਈ ਅਸੀਂ ਅਕਸਰ ਉਨ੍ਹਾਂ ਨੂੰ ਤੇਜ਼ ਧੁੱਪ ਵਿੱਚ ਟੰਗ ਦਿੰਦੇ ਹਾਂ। ਪਰ ਲਗਾਤਾਰ ਸਿੱਧੀ ਧੁੱਪ ਵਿੱਚ ਸੁਕਾਉਣ ਨਾਲ ਕੱਪੜਿਆਂ ਦਾ ਰੰਗ ਫਿੱਕਾ ਪੈ ਸਕਦਾ ਹੈ। ਸੂਰਜ ਦੀਆਂ UV ਕਿਰਨਾਂ ਕੱਪੜਿਆਂ ਦੇ ਰੰਗ ਨੂੰ ਨੁਕਸਾਨ ਪਹੁੰਚਾਉਂਦੀਆਂ ਹਨ, ਜਿਸ ਕਾਰਨ ਉਹ ਪੁਰਾਣੇ ਅਤੇ ਬੇਰੰਗ ਦਿਖਣ ਲੱਗਦੇ ਹਨ।
1. ਕੱਪੜਿਆਂ ਨੂੰ ਉਲਟਾ ਕਰਕੇ ਸੁਕਾਓ
ਗੂੜ੍ਹੇ ਜਾਂ ਰੰਗੀਨ ਕੱਪੜਿਆਂ ਨੂੰ ਹਮੇਸ਼ਾ ਅੰਦਰੋਂ ਬਾਹਰ ਕਰਕੇ ਸੁਕਾਓ। ਇਸ ਨਾਲ ਕੱਪੜੇ ਦੀ ਬਾਹਰੀ ਸਤ੍ਹਾ ਸਿੱਧੀ ਧੁੱਪ ਤੋਂ ਬਚੀ ਰਹਿੰਦੀ ਹੈ ਅਤੇ ਰੰਗ ਲੰਬੇ ਸਮੇਂ ਤੱਕ ਕਾਇਮ ਰਹਿੰਦਾ ਹੈ।
2. ਸਿੱਧੀ ਧੁੱਪ ਦੀ ਬਜਾਏ ਛਾਂ ਵਿੱਚ ਸੁਕਾਓ
ਜੇ ਸੰਭਵ ਹੋਵੇ ਤਾਂ ਕੱਪੜਿਆਂ ਨੂੰ ਹਵਾਦਾਰ ਛਾਂ ਵਾਲੀ ਥਾਂ ‘ਤੇ ਸੁਕਾਓ। ਇਸ ਨਾਲ ਕੱਪੜੇ ਵੀ ਸੁੱਕ ਜਾਣਗੇ ਅਤੇ ਰੰਗ ਵੀ ਜ਼ਿਆਦਾ ਸਮੇਂ ਤੱਕ ਤਾਜ਼ਾ ਰਹੇਗਾ।
3. ਠੰਡੇ ਪਾਣੀ ਨਾਲ ਧੋਵੋ
ਗਰਮ ਪਾਣੀ ਕੱਪੜਿਆਂ ਦੇ ਰੰਗ ਨੂੰ ਜਲਦੀ ਫਿੱਕਾ ਕਰ ਸਕਦਾ ਹੈ। ਇਸ ਲਈ ਕੱਪੜੇ ਧੋਣ ਲਈ ਠੰਡੇ ਜਾਂ ਸਧਾਰਣ ਤਾਪਮਾਨ ਵਾਲੇ ਪਾਣੀ ਦੀ ਵਰਤੋਂ ਕਰੋ।
4. ਰੰਗਾਂ ਅਨੁਸਾਰ ਕੱਪੜੇ ਵੱਖ-ਵੱਖ ਧੋਵੋ
ਗੂੜ੍ਹੇ, ਚਟਖੇਲੇ ਅਤੇ ਹਲਕੇ ਰੰਗਾਂ ਵਾਲੇ ਕੱਪੜਿਆਂ ਨੂੰ ਵੱਖ-ਵੱਖ ਧੋਣ ਨਾਲ ਰੰਗ ਫੈਲਣ ਜਾਂ ਖਰਾਬ ਹੋਣ ਦੀ ਸੰਭਾਵਨਾ ਘੱਟ ਹੁੰਦੀ ਹੈ।
5. ਬਿਨਾਂ ਲੋੜ ਵਾਰ-ਵਾਰ ਧੋਣ ਤੋਂ ਬਚੋ
ਹਰ ਵਾਰ ਪਹਿਨਣ ਤੋਂ ਬਾਅਦ ਕੱਪੜੇ ਧੋਣਾ ਜ਼ਰੂਰੀ ਨਹੀਂ ਹੁੰਦਾ। ਵਾਰ-ਵਾਰ ਧੋਣ ਨਾਲ ਕੱਪੜਿਆਂ ਦੇ ਰੇਸ਼ੇ ਅਤੇ ਰੰਗ ਦੋਵੇਂ ਕਮਜ਼ੋਰ ਹੋ ਜਾਂਦੇ ਹਨ।
ਸੁਝਾਅ
ਜੇ ਤੁਸੀਂ ਕੱਪੜੇ ਬਾਹਰ ਸੁਕਾ ਰਹੇ ਹੋ ਤਾਂ ਉਨ੍ਹਾਂ ਨੂੰ ਲੰਬੇ ਸਮੇਂ ਲਈ ਧੁੱਪ ਵਿੱਚ ਨਾ ਛੱਡੋ। ਜਿਵੇਂ ਹੀ ਕੱਪੜੇ ਸੁੱਕ ਜਾਣ, ਉਨ੍ਹਾਂ ਨੂੰ ਤੁਰੰਤ ਉਤਾਰ ਲਵੋ। ਇਸ ਨਾਲ ਕੱਪੜਿਆਂ ਦੀ ਚਮਕ ਅਤੇ ਗੁਣਵੱਤਾ ਬਰਕਰਾਰ ਰਹਿੰਦੀ ਹੈ।
