ਨਵੀਂ ਦਿੱਲੀ: ਨਵੀਂ ਦਿੱਲੀ ਵਿੱਚ ਰਹਿਣ ਵਾਲਿਆਂ ਲਈ ਇੱਕ ਅਹਿਮ ਜਾਣਕਾਰੀ ਸਾਹਮਣੇ ਆਈ ਹੈ। ਦਿੱਲੀ ਸਰਕਾਰ ਆਬਕਾਰੀ ਵਿਭਾਗ ਵੱਲੋਂ ਆਉਣ ਵਾਲੇ ਮਹੀਨਿਆਂ ਲਈ “ਡਰਾਈ ਡੇਅ” ਤਾਰੀਖਾਂ ਦਾ ਐਲਾਨ ਕੀਤਾ ਗਿਆ ਹੈ, ਜਿਨ੍ਹਾਂ ਦਿਨਾਂ ਸ਼ਰਾਬ ਦੀ ਵਿਕਰੀ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਰਹੇਗੀ।
ਕਿਹੜੀਆਂ ਤਾਰੀਖਾਂ ‘ਤੇ ਰਹੇਗਾ ਡਰਾਈ ਡੇਅ?
ਹੇਠ ਲਿਖੀਆਂ ਤਾਰੀਖਾਂ ‘ਤੇ ਰਾਜਧਾਨੀ ਵਿੱਚ ਸ਼ਰਾਬ ਦੀ ਵਿਕਰੀ ਬੰਦ ਰਹੇਗੀ:
- 1 ਮਈ – ਬੁੱਧ ਪੂਰਨਿਮਾ
- 27 ਮਈ – ਬਕਰੀਦ
- 26 ਜੂਨ – ਮੁਹੱਰਮ
- 15 ਅਗਸਤ – ਆਜ਼ਾਦੀ ਦਿਵਸ
- 9 ਸਤੰਬਰ – ਜਨਮ ਅਸ਼ਟਮੀ
ਇਨ੍ਹਾਂ ਦਿਨਾਂ ਦੌਰਾਨ ਕੋਈ ਵੀ ਲਾਇਸੈਂਸਸ਼ੁਦਾ ਦੁਕਾਨ ਜਾਂ ਅਹਾਤਾ ਸ਼ਰਾਬ ਨਹੀਂ ਵੇਚ ਸਕੇਗਾ।
ਕਿਸਨੂੰ ਮਿਲੇਗੀ ਛੋਟ?
ਕੁਝ ਖਾਸ ਛੋਟਾਂ ਵੀ ਦਿੱਤੀਆਂ ਗਈਆਂ ਹਨ। ਜਿਨ੍ਹਾਂ ਹੋਟਲਾਂ ਕੋਲ L-15 ਜਾਂ L-15F ਲਾਇਸੈਂਸ ਹੈ, ਉੱਥੇ ਸਿਰਫ਼ ਰਹਿਣ ਵਾਲੇ ਮਹਿਮਾਨਾਂ ਨੂੰ ਸ਼ਰਾਬ ਪਰੋਸੀ ਜਾ ਸਕਦੀ ਹੈ। ਬਾਹਰੋਂ ਆਉਣ ਵਾਲੇ ਗ੍ਰਾਹਕਾਂ ਲਈ ਇਹ ਸਹੂਲਤ ਉਪਲਬਧ ਨਹੀਂ ਹੋਵੇਗੀ।
ਦੁਕਾਨਦਾਰਾਂ ਲਈ ਹਦਾਇਤਾਂ
ਸਰਕਾਰ ਨੇ ਸਾਰੇ ਵਿਕਰੇਤਾਵਾਂ ਨੂੰ ਆਦੇਸ਼ ਦਿੱਤਾ ਹੈ ਕਿ ਉਹ ਡਰਾਈ ਡੇਅ ਦੀ ਜਾਣਕਾਰੀ ਆਪਣੀਆਂ ਦੁਕਾਨਾਂ ਦੇ ਨੋਟਿਸ ਬੋਰਡ ‘ਤੇ ਲਾਜ਼ਮੀ ਲਗਾਉਣ ਅਤੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ।
ਨਿਯਮ ਤੋੜਣ ‘ਤੇ ਕਾਰਵਾਈ
ਜੇਕਰ ਕੋਈ ਲਾਇਸੈਂਸਧਾਰਕ ਇਨ੍ਹਾਂ ਹੁਕਮਾਂ ਦੀ ਉਲੰਘਣਾ ਕਰਦਾ ਹੈ, ਤਾਂ ਉਸ ਵਿਰੁੱਧ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ ਅਤੇ ਲਾਇਸੈਂਸ ਰੱਦ ਵੀ ਹੋ ਸਕਦਾ ਹੈ।
ਇਹ ਡਰਾਈ ਡੇਅ ਕੈਲੰਡਰ ਉਹਨਾਂ ਲੋਕਾਂ ਲਈ ਕਾਫੀ ਮਹੱਤਵਪੂਰਨ ਹੈ ਜੋ ਤਿਉਹਾਰਾਂ ਜਾਂ ਛੁੱਟੀਆਂ ਦੌਰਾਨ ਆਪਣੀ ਯੋਜਨਾ ਬਣਾਉਂਦੇ ਹਨ।
