ਨਵੀਂ ਦਿੱਲੀ: ਅਦਾਕਾਰਾ ਅਤੇ ਭਾਜਪਾ ਸੰਸਦ ਮੈਂਬਰ ਕੰਗਨਾ ਰਣੌਤ ਨੇ ਰੱਖੜੀ ਦੇ ਮੌਕੇ ’ਤੇ ਜਾਰੀ ਕੀਤੇ ਗਏ ਇੱਕ ਜਵੈਲਰੀ ਇਸ਼ਤਿਹਾਰ ਵਿੱਚ ਅਦਾਕਾਰਾ ਕ੍ਰਿਤੀ ਸੈਨਨ ਦੀ ਡ੍ਰੈਸਿੰਗ ’ਤੇ ਸਵਾਲ ਚੁੱਕੇ ਹਨ। ਇਸ਼ਤਿਹਾਰ ਵਿੱਚ ਕ੍ਰਿਤੀ ਸੈਨਨ ਇੰਡੋ-ਵੈਸਟਰਨ ਪਹਿਰਾਵੇ ਵਿੱਚ ਨਜ਼ਰ ਆ ਰਹੀ ਹੈ, ਜਿਸ ਵਿੱਚ ਬ੍ਰੇਲੇਟ-ਸਟਾਈਲ ਬਲਾਊਜ਼, ਕੇਪ ਅਤੇ ਡ੍ਰੇਪਡ ਸਕਰਟ ਸ਼ਾਮਲ ਹਨ।
ਕੰਗਨਾ ਰਣੌਤ ਨੇ ਸੋਮਵਾਰ ਸ਼ਾਮ ਆਪਣੀ ਇੰਸਟਾਗ੍ਰਾਮ ਸਟੋਰੀ ’ਤੇ ਇਸ਼ਤਿਹਾਰ ਨੂੰ ਲੈ ਕੇ ਆਪਣੀ ਪ੍ਰਤੀਕਿਰਿਆ ਸਾਂਝੀ ਕੀਤੀ। ਉਨ੍ਹਾਂ ਕਿਹਾ ਕਿ ਅੱਜ ਦੀਆਂ ਔਰਤਾਂ ਕੋਲ ਪਹਿਰਾਵੇ ਦੇ ਕਈ ਵਿਕਲਪ ਹਨ ਅਤੇ ਰੱਖੜੀ ਵਰਗੇ ਤਿਉਹਾਰ ਲਈ ਹੋਰ ਵੀ ਕਈ ਤਰੀਕਿਆਂ ਨਾਲ ਸਟਾਈਲਿੰਗ ਕੀਤੀ ਜਾ ਸਕਦੀ ਸੀ।
ਕੰਗਨਾ ਨੇ ਇਸ਼ਤਿਹਾਰ ਦੀ ਸਟਾਈਲਿੰਗ ’ਤੇ ਤਨਜ਼ ਕਰਦਿਆਂ ਪੁੱਛਿਆ ਕਿ ਰੱਖੜੀ ਦੇ ਮੌਕੇ ’ਤੇ ਅਜਿਹਾ ਪਹਿਰਾਵਾ ਚੁਣਨ ਦੀ ਕੀ ਲੋੜ ਸੀ, ਜਦਕਿ ਔਰਤਾਂ ਕੋਲ ਕਾਕਟੇਲ ਡ੍ਰੈੱਸ, ਲਹਿੰਗਾ-ਚੋਲੀ, ਜੀਨਸ, ਸਾੜੀ ਅਤੇ ਸਲਵਾਰ ਕਮੀਜ਼ ਸਮੇਤ ਕਈ ਵਿਕਲਪ ਮੌਜੂਦ ਹਨ। ਉਨ੍ਹਾਂ ਇਸ਼ਤਿਹਾਰ ਨੂੰ ਜਾਣਬੁੱਝ ਕੇ ‘ਡਰਾਉਣਾ’ ਦਿਖਣ ਵਾਲਾ ਵੀ ਦੱਸਿਆ।
ਇਸ ਇਸ਼ਤਿਹਾਰ ਨੂੰ ਲੈ ਕੇ ਸੋਸ਼ਲ ਮੀਡੀਆ ’ਤੇ ਵੀ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਸਾਹਮਣੇ ਆਈਆਂ। ਕਈ ਯੂਜ਼ਰਾਂ ਨੇ ਰੱਖੜੀ ਵਰਗੇ ਰਵਾਇਤੀ ਤਿਉਹਾਰ ਵਿੱਚ ਪਹਿਰਾਵੇ ਦੀ ਚੋਣ ’ਤੇ ਸਵਾਲ ਉਠਾਏ, ਜਦਕਿ ਕੁਝ ਲੋਕਾਂ ਨੇ ਇਸ਼ਤਿਹਾਰ ਵਿੱਚ ਰਵਾਇਤੀ ਰੱਖੜੀ ਦੀਆਂ ਰਸਮਾਂ ਨਾ ਦਿਖਾਏ ਜਾਣ ’ਤੇ ਵੀ ਟਿੱਪਣੀਆਂ ਕੀਤੀਆਂ।
ਰੱਖੜੀ ਭੈਣ-ਭਰਾ ਦੇ ਪਿਆਰ ਅਤੇ ਰਿਸ਼ਤੇ ਨੂੰ ਸਮਰਪਿਤ ਤਿਉਹਾਰ ਹੈ। ਇਸ ਮੌਕੇ ਭੈਣਾਂ ਆਪਣੇ ਭਰਾਵਾਂ ਦੇ ਗੁੱਟ ’ਤੇ ਰੱਖੜੀ ਬੰਨ੍ਹਦੀਆਂ ਹਨ ਅਤੇ ਰਵਾਇਤੀ ਤੌਰ ’ਤੇ ਤਿਲਕ, ਆਰਤੀ ਤੇ ਮਿਠਾਈਆਂ ਦੀ ਰਸਮ ਵੀ ਕੀਤੀ ਜਾਂਦੀ ਹੈ।
ਵਰਕਫਰੰਟ ਦੀ ਗੱਲ ਕਰੀਏ ਤਾਂ ਕ੍ਰਿਤੀ ਸੈਨਨ ਨੂੰ ਹਾਲ ਹੀ ਵਿੱਚ ‘ਕਾਕਟੇਲ 2’ ਵਿੱਚ ਦੇਖਿਆ ਗਿਆ ਸੀ, ਜਦਕਿ ਕੰਗਨਾ ਰਣੌਤ ਦੀ ਹਾਲੀਆ ਫਿਲਮ ‘ਭਾਰਤ ਭਾਗਿਆ ਵਿਧਾਤਾ’ ਹੈ।
