ਅਮਰੀਕਾ ਵੱਲੋਂ ਦੱਖਣੀ ਈਰਾਨ ਵਿੱਚ ਰੱਖਿਆਤਮਕ ਹਮਲੇ, ਕਿਹਾ—ਆਤਮ-ਰੱਖਿਆ ਵਿੱਚ ਕੀਤੀ ਕਾਰਵਾਈ; ਆਪਣੇ ਸੈਨਿਕਾਂ ਦੀ ਸੁਰੱਖਿਆ ਲਈ ਕਦਮ ਉਠਾਇਆ
ਅਮਰੀਕਾ-ਈਰਾਨ ਸ਼ਾਂਤੀ ਗੱਲਬਾਤ ਵਿਚਕਾਰ ਤਣਾਅ ਵਧਿਆ: ਅਮਰੀਕੀ ਫੌਜ ਵੱਲੋਂ ਦੱਖਣੀ ਈਰਾਨ ’ਤੇ ਹਮਲਾ, ਆਤਮ-ਰੱਖਿਆ ਦੇ ਦਾਅਵੇ ਹੇਠ ਕਾਰਵਾਈ ਕੀਤੀ ਗਈ
ਨਿਸ਼ਾਨਿਆਂ ਵਿੱਚ ਮਿਜ਼ਾਈਲ ਲਾਂਚ ਸਾਈਟਾਂ ਅਤੇ ਸਮੁੰਦਰੀ ਮਾਈਨ ਵਿਛਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਈਰਾਨੀ ਕਿਸ਼ਤੀਆਂ ਸ਼ਾਮਲ ਸਨ। ਯੂਐਸ ਸੈਂਟਰਲ ਕਮਾਂਡ ਨੇ ਕਿਹਾ ਹੈ ਕਿ ਮੌਜੂਦਾ ਜੰਗਬੰਦੀ ਦੇ ਦੌਰਾਨ ਸੰਜਮ ਬਰਤਦੇ ਹੋਏ ਉਹ ਆਪਣੇ ਸੈਨਿਕਾਂ ਦੀ ਸੁਰੱਖਿਆ ਲਈ ਕਾਰਵਾਈ ਜਾਰੀ ਰੱਖ ਰਹੀ ਹੈ।
ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਆਪਣੇ ਮੈਮੋਰੀਅਲ ਡੇਅ ਭਾਸ਼ਣ ਦੌਰਾਨ ਕਿਹਾ ਕਿ “ਈਰਾਨ ਕਦੇ ਵੀ ਪਰਮਾਣੂ ਹਥਿਆਰ ਨਹੀਂ ਰੱਖ ਸਕੇਗਾ।” ਬਾਅਦ ਵਿੱਚ ਉਨ੍ਹਾਂ ਨੇ ਸੋਸ਼ਲ ਮੀਡੀਆ ’ਤੇ ਸਪੱਸ਼ਟ ਕੀਤਾ ਕਿ ਸੰਸ਼ੋਧਿਤ ਯੂਰੇਨੀਅਮ ਨੂੰ ਜਾਂ ਤਾਂ ਤੁਰੰਤ ਅਮਰੀਕਾ ਦੇ ਹਵਾਲੇ ਕੀਤਾ ਜਾਵੇ ਤਾਂ ਜੋ ਉਸਨੂੰ ਵਾਪਸ ਲਿਆ ਕੇ ਨਸ਼ਟ ਕੀਤਾ ਜਾ ਸਕੇ, ਜਾਂ ਫਿਰ ਈਰਾਨ ਖੁਦ ਅਮਰੀਕਾ ਦੇ ਤਾਲਮੇਲ ਨਾਲ ਇਸਨੂੰ ਆਪਣੇ ਦੇਸ਼ ਅੰਦਰ ਜਾਂ ਕਿਸੇ ਸਾਂਝੇ ਤੌਰ ’ਤੇ ਸਹਿਮਤ ਸਥਾਨ ’ਤੇ ਨਸ਼ਟ ਕਰੇ।
ਪਰਮਾਣੂ ਊਰਜਾ ਕਮਿਸ਼ਨ ਜਾਂ ਇੱਕ ਸਮਾਨ ਸੰਸਥਾ ਇਸ ਪੂਰੀ ਪ੍ਰਕਿਰਿਆ ਅਤੇ ਘਟਨਾ ਨੂੰ ਦੇਖਣ ਲਈ ਮੌਜੂਦ ਹੋਣੀ ਚਾਹੀਦੀ ਹੈ।
ਅਮਰੀਕਾ ਅਤੇ ਈਰਾਨ ਵਿਚਕਾਰ ਚੱਲ ਰਹੀ ਸ਼ਾਂਤੀ ਵਾਰਤਾ ਦਰਮਿਆਨ ਈਰਾਨ ਦੇ ਬੰਦਰ ਅੱਬਾਸ ਅਤੇ ਆਲੇ ਦੁਆਲੇ ਦੇ ਤੱਟੀ ਇਲਾਕਿਆਂ ਵਿੱਚ ਧਮਾਕਿਆਂ ਵਰਗੀਆਂ ਆਵਾਜ਼ਾਂ ਸੁਣੀਆਂ ਗਈਆਂ ਹਨ। ਸਥਾਨਕ ਨਿਵਾਸੀਆਂ ਮੁਤਾਬਕ ਬੰਦਰ ਅੱਬਾਸ ਸ਼ਹਿਰ ਵਿੱਚ ਕਈ ਧਮਾਕਿਆਂ ਦੀ ਆਵਾਜ਼ ਸੁਣੀ ਗਈ, ਜਦਕਿ ਦੱਖਣੀ ਤੱਟ ਦੇ ਨੇੜਲੇ ਸਿਰਿਕ ਅਤੇ ਜਸਕ ਕਸਬਿਆਂ ਵਿੱਚ ਵੀ ਇਸੇ ਤਰ੍ਹਾਂ ਦੀਆਂ ਆਵਾਜ਼ਾਂ ਦੀਆਂ ਰਿਪੋਰਟਾਂ ਮਿਲੀਆਂ ਹਨ। ਹਾਲਾਂਕਿ, ਇਨ੍ਹਾਂ ਧਮਾਕਿਆਂ ਦੇ ਸਹੀ ਸਰੋਤ ਅਤੇ ਸਥਾਨ ਬਾਰੇ ਤੁਰੰਤ ਕੋਈ ਪੁਸ਼ਟੀ ਨਹੀਂ ਹੋ ਸਕੀ ਹੈ।
