ਅਮਰੀਕਾ: ਡੋਨਾਲਡ ਟਰੰਪ ਇੱਕ ਵਾਰ ਫਿਰ ਗਲੋਬਲ ਰਾਜਨੀਤੀ ਅਤੇ ਵਪਾਰਕ ਮੰਚ ‘ਤੇ ਚਰਚਾ ਦਾ ਕੇਂਦਰ ਬਣੇ ਹੋਏ ਹਨ। ਟਰੰਪ ਇਸ ਹਫ਼ਤੇ ਚੀਨ ਦੌਰੇ ‘ਤੇ ਬੀਜਿੰਗ ਪਹੁੰਚੇ ਹਨ, ਜੋ ਅਮਰੀਕਾ-ਚੀਨ ਸੰਬੰਧਾਂ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ। ਇਹ ਟਰੰਪ ਦਾ 2017 ਤੋਂ ਬਾਅਦ ਚੀਨ ਦਾ ਪਹਿਲਾ ਰਾਸ਼ਟਰਪਤੀ ਦੌਰਾ ਹੈ।
ਟਰੰਪ ਦੇ ਨਾਲ 16 ਤੋਂ ਵੱਧ ਅਮਰੀਕੀ ਕਾਰੋਬਾਰੀ ਆਗੂਆਂ ਦਾ ਉੱਚ ਪੱਧਰੀ ਵਫ਼ਦ ਵੀ ਸ਼ਾਮਲ ਹੈ, ਜਿਸ ਵਿੱਚ ਏਲਨ ਮਸਕ, ਟਿਮ ਕੁੱਕ ਅਤੇ ਹੋਰ ਪ੍ਰਮੁੱਖ ਉਦਯੋਗਪਤੀ ਸ਼ਾਮਲ ਹਨ। ਇਹ ਦੌਰਾ ਸਿਰਫ਼ ਕੂਟਨੀਤਿਕ ਨਹੀਂ, ਸਗੋਂ ਵਪਾਰ, ਨਿਵੇਸ਼ ਅਤੇ ਟੈਕਨੋਲੋਜੀ ਸਹਿਯੋਗ ਦੇ ਨਜ਼ਰੀਏ ਨਾਲ ਵੀ ਬਹੁਤ ਅਹਿਮ ਮੰਨਿਆ ਜਾ ਰਿਹਾ ਹੈ।
ਚਰਚਾ ਦਾ ਕੇਂਦਰ ਬੋਇੰਗ ਨਾਲ ਸੰਭਾਵਿਤ ਜਹਾਜ਼ ਸੌਦੇ ਵੀ ਹਨ। ਰਿਪੋਰਟਾਂ ਮੁਤਾਬਕ ਚੀਨ ਵੱਲੋਂ ਵੱਡੇ ਪੱਧਰ ‘ਤੇ ਬੋਇੰਗ ਜਹਾਜ਼ਾਂ ਦੀ ਖਰੀਦ ਸਬੰਧੀ ਗੱਲਬਾਤ ਹੋ ਸਕਦੀ ਹੈ, ਜਿਸਨੂੰ ਹਵਾਈ ਉਦਯੋਗ ਲਈ ਵੱਡਾ ਮੋੜ ਮੰਨਿਆ ਜਾ ਰਿਹਾ ਹੈ।
ਦੌਰੇ ਦੌਰਾਨ ਟਰੰਪ ਅਤੇ ਚੀਨੀ ਨੇਤ੍ਰਿਤਵ ਵਿਚਕਾਰ ਵਪਾਰ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਤਕਨੀਕੀ ਸਹਿਯੋਗ ਅਤੇ ਨਿਵੇਸ਼ ਨਾਲ ਜੁੜੇ ਕਈ ਅਹਿਮ ਮੁੱਦਿਆਂ ‘ਤੇ ਚਰਚਾ ਹੋਣ ਦੀ ਸੰਭਾਵਨਾ ਹੈ। ਵਿਸ਼ਲੇਸ਼ਕ ਇਸ ਦੌਰੇ ਨੂੰ ਅਮਰੀਕਾ-ਚੀਨ ਵਪਾਰਕ ਸੰਬੰਧਾਂ ਵਿੱਚ ਨਵੇਂ ਅਧਿਆਇ ਵਜੋਂ ਦੇਖ ਰਹੇ ਹਨ।
