ਲਾ ਪਾਜ਼ (ਬੋਲੀਵੀਆ): ਬੋਲੀਵੀਆ ਦੀ ਰਾਜਧਾਨੀ ਲਾ-ਪਾਜ਼ ਨੇੜੇ ਸ਼ੁੱਕਰਵਾਰ ਨੂੰ ਇੱਕ ਭਿਆਨਕ ਜਹਾਜ਼ ਹਾਦਸਾ ਵਾਪਰਿਆ। ਬੋਲੀਵੀਆਈ ਹਵਾਈ ਸੈਨਾ ਦਾ ਕਾਰਗੋ ਜਹਾਜ਼ ਲਾਕਹੀਡ ਸੀ-130 ਹਰਕੁਲੀਸ ਉਡਾਣ ਭਰਨ ਦੇ ਕੁਝ ਹੀ ਪਲਾਂ ਬਾਅਦ ਬੇਕਾਬੂ ਹੋ ਕੇ ਐਲ ਆਲਟੋ ਸ਼ਹਿਰ ਦੇ ਰੁਝੇਵਿਆਂ ਭਰੇ ਹਾਈਵੇਅ ‘ਤੇ ਜਾ ਡਿੱਗਿਆ। ਇਸ ਹਾਦਸੇ ਵਿੱਚ ਹੁਣ ਤੱਕ 15 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋ ਚੁੱਕੀ ਹੈ।
ਹਾਲੇ ਤੱਕ ਇਹ ਸਪੱਸ਼ਟ ਨਹੀਂ ਕਿ ਮਰਨ ਵਾਲਿਆਂ ਵਿੱਚ ਜਹਾਜ਼ ਦੇ ਕ੍ਰੂ ਮੈਂਬਰ ਕਿੰਨੇ ਸਨ ਅਤੇ ਆਮ ਨਾਗਰਿਕ ਕਿੰਨੇ।
ਹਾਦਸਾ ਉਸ ਵੇਲੇ ਹੋਰ ਵੀ ਹੈਰਾਨੀਜਨਕ ਬਣ ਗਿਆ ਜਦੋਂ ਪਤਾ ਲੱਗਾ ਕਿ ਜਹਾਜ਼ ਕੇਂਦਰੀ ਬੈਂਕ ਤੋਂ ਨਵੇਂ ਛਪੇ ਨੋਟਾਂ ਦੀ ਖੇਪ ਲੈ ਕੇ ਜਾ ਰਿਹਾ ਸੀ। ਟੱਕਰ ਤੋਂ ਬਾਅਦ ਜਹਾਜ਼ ਦਾ ਮਲਬਾ ਅਤੇ ਲੱਖਾਂ ਦੀ ਨਕਦੀ ਸੜਕ ‘ਤੇ ਖਿਲਰ ਗਈ। ਮਦਦ ਕਰਨ ਦੀ ਬਜਾਏ ਕਈ ਲੋਕ ਨੋਟ ਇਕੱਠੇ ਕਰਨ ਲਈ ਟੁੱਟ ਪਏ, ਜਿਸ ਨਾਲ ਹਾਲਾਤ ਬੇਕਾਬੂ ਹੋ ਗਏ।
ਪੁਲਿਸ ਨੂੰ ਭੀੜ ਨੂੰ ਹਟਾਉਣ ਅਤੇ ਸਥਿਤੀ ਕਾਬੂ ਕਰਨ ਲਈ ਸਖ਼ਤ ਕਾਰਵਾਈ ਕਰਨੀ ਪਈ। ਫਾਇਰਫਾਈਟਰਜ਼ ਨੇ ਕਈ ਘੰਟਿਆਂ ਦੀ ਮੁਸ਼ੱਕਤ ਤੋਂ ਬਾਅਦ ਅੱਗ ‘ਤੇ ਕਾਬੂ ਪਾਇਆ। ਜ਼ਖਮੀਆਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ ਹੈ ਅਤੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਗਿਆ ਹੈ। ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
