ਜੰਮੂ: ਵਿਸ਼ੇਸ਼ ਰੇਲਗੱਡੀ ਦਾ ਵਿਸਥਾਰ, ਹੁਣ ਬਡਗਾਮ ਤੋਂ ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ ਤੱਕ ਸਿੱਧੀ ਸੇਵਾ

ਯਾਤਰੀਆਂ ਦੀ ਸੁਵਿਧਾ ਨੂੰ ਮੁੱਖ ਰੱਖਦੇ ਹੋਏ ਉੱਤਰੀ ਰੇਲਵੇ ਦੇ ਜੰਮੂ ਡਿਵੀਜ਼ਨ ਵੱਲੋਂ ਵਿਸ਼ੇਸ਼ ਰੇਲ ਸੇਵਾਵਾਂ ਦੇ ਰੂਟ ਅਤੇ ਮਿਆਦ ਵਿੱਚ ਲਗਾਤਾਰ ਵਿਸਥਾਰ ਕੀਤਾ ਜਾ ਰਿਹਾ ਹੈ। ਇਸੀ ਕੜੀ ਤਹਿਤ ਵਿਸ਼ੇਸ਼ ਰੇਲਗੱਡੀ ਨੰਬਰ 04688/04687 (ਬਡਗਾਮ–ਬਨਿਹਾਲ) ਨੂੰ ਹੁਣ ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ ਰੇਲਵੇ ਸਟੇਸ਼ਨ ਤੱਕ ਚਲਾਉਣ ਦਾ ਫੈਸਲਾ ਲਿਆ ਗਿਆ ਹੈ।

ਰੇਲਵੇ ਅਧਿਕਾਰੀਆਂ ਮੁਤਾਬਕ ਇਹ ਵਿਸ਼ੇਸ਼ ਰੇਲਗੱਡੀ 11 ਫਰਵਰੀ ਤੋਂ ਬਡਗਾਮ–ਬਨਿਹਾਲ–ਕਟੜਾ ਦੇ ਦਰਮਿਆਨ ਚੱਲੇਗੀ। ਇਸ ਨਾਲ ਜੰਮੂ ਅਤੇ ਕਸ਼ਮੀਰ ਵਿਚਕਾਰ ਰੇਲ ਸੰਪਰਕ ਹੋਰ ਮਜ਼ਬੂਤ ਹੋਵੇਗਾ ਅਤੇ ਸਥਾਨਕ ਲੋਕਾਂ ਦੇ ਨਾਲ-ਨਾਲ ਦੇਸ਼ ਭਰ ਤੋਂ ਆਉਣ ਵਾਲੇ ਸੈਲਾਨੀਆਂ ਨੂੰ ਵੀ ਵੱਡਾ ਲਾਭ ਮਿਲੇਗਾ।

ਵਿਸ਼ੇਸ਼ ਰੇਲਗੱਡੀ 04688 ਆਪਣੇ ਮੌਜੂਦਾ ਸ਼ਡਿਊਲ ਅਨੁਸਾਰ ਬਡਗਾਮ ਤੋਂ ਬਨਿਹਾਲ ਤੱਕ ਚੱਲੇਗੀ।

• ਬਨਿਹਾਲ ਤੋਂ ਰੇਲਗੱਡੀ ਸਵੇਰੇ 10:10 ਵਜੇ ਰਵਾਨਾ ਹੋ ਕੇ

• ਦੁਪਹਿਰ 1:00 ਵਜੇ ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ ਪਹੁੰਚੇਗੀ

ਬਨਿਹਾਲ ਤੋਂ ਬਾਅਦ ਇਹ ਰੇਲਗੱਡੀ ਹੇਠ ਲਿਖੇ ਸਟੇਸ਼ਨਾਂ ’ਤੇ ਰੁਕੇਗੀ:
ਖਾਰੀ, ਸੁੰਬਰ, ਸੰਗਲਦਾਨ, ਸਾਵਲਕੋਟ, ਦੁੱਗਾ, ਬੱਕਲ ਅਤੇ ਰਿਆਸੀ।

ਵਾਪਸੀ ਦੌਰਾਨ ਵਿਸ਼ੇਸ਼ ਰੇਲਗੱਡੀ ਨੰਬਰ 04687

• ਕਟੜਾ ਤੋਂ ਦੁਪਹਿਰ 1:45 ਵਜੇ ਰਵਾਨਾ ਹੋਵੇਗੀ

• ਅਤੇ ਸ਼ਾਮ 5:30 ਵਜੇ ਬਨਿਹਾਲ ਪਹੁੰਚੇਗੀ

ਇਸ ਤੋਂ ਬਾਅਦ ਬਨਿਹਾਲ ਤੋਂ ਬਡਗਾਮ ਤੱਕ ਟ੍ਰੇਨ ਆਪਣੇ ਪਹਿਲਾਂ ਤੋਂ ਨਿਰਧਾਰਤ ਸ਼ਡਿਊਲ ਅਨੁਸਾਰ ਹੀ ਚੱਲੇਗੀ। ਕਠੂਆ ਅਤੇ ਬਨਿਹਾਲ ਵਿਚਕਾਰ ਸਾਰੇ ਸਟਾਪੇਜ ਪਹਿਲਾਂ ਵਾਂਗ ਹੀ ਰਹਿਣਗੇ।

ਸੀਨੀਅਰ ਡਿਵੀਜ਼ਨਲ ਕਮਰਸ਼ੀਅਲ ਮੈਨੇਜਰ ਉਚਿਤ ਸਿੰਘਲ ਨੇ ਦੱਸਿਆ ਕਿ ਇਸ ਸੇਵਾ ਦੇ ਵਿਸਥਾਰ ਦਾ ਮੁੱਖ ਉਦੇਸ਼ ਬਡਗਾਮ ਤੋਂ ਕਟੜਾ ਤੱਕ ਯਾਤਰਾ ਨੂੰ ਵਧੇਰੇ ਸੁਗਮ, ਸੁਰੱਖਿਅਤ ਅਤੇ ਸੁਵਿਧਾਜਨਕ ਬਣਾਉਣਾ ਹੈ। ਉਨ੍ਹਾਂ ਯਾਤਰੀਆਂ ਨੂੰ ਅਪੀਲ ਕੀਤੀ ਕਿ ਯਾਤਰਾ ਕਰਨ ਤੋਂ ਪਹਿਲਾਂ ਟ੍ਰੇਨ ਨਾਲ ਸਬੰਧਤ ਅਪਡੇਟ ਜਾਣਕਾਰੀ ਲਈ ਰੇਲਵੇ ਦੀ ਅਧਿਕਾਰਤ ਵੈੱਬਸਾਈਟ ਜ਼ਰੂਰ ਵੇਖਣ।

ਇਹ ਰੇਲ ਸੇਵਾ ਵਿਸਥਾਰ ਨਾ ਸਿਰਫ਼ ਧਾਰਮਿਕ ਯਾਤਰੀਆਂ ਲਈ ਸਹੂਲਤ ਲਿਆਏਗਾ, ਸਗੋਂ ਸੈਲਾਨੀ ਅਤੇ ਸਥਾਨਕ ਨਿਵਾਸੀਆਂ ਲਈ ਵੀ ਜੰਮੂ–ਕਸ਼ਮੀਰ ਵਿੱਚ ਆਵਾਜਾਈ ਨੂੰ ਹੋਰ ਆਸਾਨ ਬਣਾਏਗਾ।