ਮੁੰਬਈ: ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਅਤੇ ਅਮਰੀਕਾ-ਇਰਾਨ ਤਣਾਅ ਕਾਰਨ ਮੰਗਲਵਾਰ ਨੂੰ ਭਾਰਤੀ ਸ਼ੇਅਰ ਬਾਜ਼ਾਰ ਦੀ ਸ਼ੁਰੂਆਤ ਕਮਜ਼ੋਰ ਰਹੀ। ਸੈਂਸੈਕਸ 300 ਤੋਂ ਵੱਧ ਅੰਕ ਡਿੱਗਿਆ, ਜਦਕਿ ਨਿਫਟੀ 24,300 ਦੇ ਪੱਧਰ ਤੋਂ ਹੇਠਾਂ ਆ ਗਿਆ। ਨਿਵੇਸ਼ਕਾਂ ਵਿੱਚ ਗਲੋਬਲ ਊਰਜਾ ਸਪਲਾਈ ਨੂੰ ਲੈ ਕੇ ਚਿੰਤਾ ਵਧੀ ਹੈ।
ਸੈਂਸੈਕਸ 77,418.97 ਦੇ ਪੱਧਰ ’ਤੇ ਖੁੱਲ੍ਹਿਆ ਅਤੇ ਲਗਭਗ 77,442.77 ’ਤੇ ਕਾਰੋਬਾਰ ਕਰ ਰਿਹਾ ਸੀ, ਜੋ ਪਿਛਲੇ ਬੰਦ ਪੱਧਰ ਨਾਲੋਂ 285.39 ਅੰਕ ਜਾਂ 0.37 ਫੀਸਦੀ ਹੇਠਾਂ ਸੀ। ਇਸੇ ਤਰ੍ਹਾਂ ਨਿਫਟੀ 24,223.85 ’ਤੇ ਖੁੱਲ੍ਹਿਆ ਅਤੇ 57.25 ਅੰਕ ਜਾਂ 0.24 ਫੀਸਦੀ ਦੀ ਗਿਰਾਵਟ ਨਾਲ 24,230.40 ਦੇ ਆਸ-ਪਾਸ ਰਿਹਾ।
ਇਸ ਦੌਰਾਨ ਬ੍ਰੈਂਟ ਕੱਚਾ ਤੇਲ 91 ਡਾਲਰ ਪ੍ਰਤੀ ਬੈਰਲ ਤੋਂ ਉੱਪਰ ਅਤੇ WTI 85 ਡਾਲਰ ਤੋਂ ਪਾਰ ਪਹੁੰਚ ਗਿਆ। ਹੋਰਮੁਜ਼ ਜਲਡਮਰੂਮੱਧ ਰਾਹੀਂ ਸਮੁੰਦਰੀ ਆਵਾਜਾਈ ਨੂੰ ਲੈ ਕੇ ਅਨਿਸ਼ਚਿਤਤਾ ਅਤੇ ਅਮਰੀਕਾ-ਇਰਾਨ ਤਣਾਅ ਨੇ ਤੇਲ ਦੀਆਂ ਕੀਮਤਾਂ ਨੂੰ ਪ੍ਰਭਾਵਿਤ ਕੀਤਾ।
ਸੈਕਟਰਾਂ ਵਿੱਚ ਨਿਫਟੀ IT ਅਤੇ FMCG ਇੱਕ ਫੀਸਦੀ ਤੋਂ ਵੱਧ ਡਿੱਗੇ, ਜਦਕਿ Realty ਅਤੇ Metal ਵਿੱਚ ਇੱਕ ਫੀਸਦੀ ਤੋਂ ਵੱਧ ਤੇਜ਼ੀ ਰਹੀ। M&M, Sun Pharma ਅਤੇ Tata Steel ਵਰਗੇ ਸ਼ੇਅਰਾਂ ਵਿੱਚ ਖਰੀਦਦਾਰੀ ਦੇਖੀ ਗਈ, ਜਦਕਿ Infosys, HCLTech ਅਤੇ Tech Mahindra ਦਬਾਅ ਵਿੱਚ ਰਹੇ।
ਮਾਰਕੀਟ ਮਾਹਿਰਾਂ ਮੁਤਾਬਕ ਨਿਫਟੀ ਲਈ 24,200 ਮਹੱਤਵਪੂਰਨ ਸਪੋਰਟ ਹੈ। 24,360-24,400 ਦਾ ਪੱਧਰ ਪਾਰ ਹੋਣ ’ਤੇ ਬਾਜ਼ਾਰ ਵਿੱਚ ਰਿਕਵਰੀ ਆ ਸਕਦੀ ਹੈ, ਜਦਕਿ ਉੱਚੀਆਂ ਤੇਲ ਕੀਮਤਾਂ ਅਤੇ ਵਿਦੇਸ਼ੀ ਨਿਵੇਸ਼ਕਾਂ ਦੀ ਵਿਕਰੀ ਚੁਣੌਤੀ ਬਣੀ ਹੋਈ ਹੈ।
