ਮੋਗਾ: ਮੋਗਾ ਪੁਲੀਸ ਨੇ ਫ਼ਿਰੋਜ਼ਪੁਰ ਦੀ ਇੱਕ ਨੌਜਵਾਨ ਲੜਕੀ ਨੂੰ ਕਥਿਤ ਤੌਰ ’ਤੇ ਫ਼ਰਜ਼ੀ ਪੰਜਾਬ ਪੁਲੀਸ ਅਧਿਕਾਰੀ ਬਣ ਕੇ ਰਹਿਣ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਹੈ। ਮੁਲਜ਼ਮ ਦੀ ਪਛਾਣ ਪਿੰਡ ਮੱਲੇਵਾਲਾ, ਜ਼ਿਲ੍ਹਾ ਫ਼ਿਰੋਜ਼ਪੁਰ ਦੀ ਕੋਮਲਪ੍ਰੀਤ ਕੌਰ ਵਜੋਂ ਹੋਈ ਹੈ। ਪੁਲੀਸ ਮੁਤਾਬਕ ਉਹ ਦੋ ਮਹੀਨਿਆਂ ਤੋਂ ਵੱਧ ਸਮੇਂ ਤੱਕ ਆਪਣੇ ਆਪ ਨੂੰ ਪੰਜਾਬ ਪੁਲੀਸ ਦੀ ਸਹਾਇਕ ਸਬ-ਇੰਸਪੈਕਟਰ (ASI) ਦੱਸਦੀ ਰਹੀ।
ਜਾਂਚ ਅਨੁਸਾਰ, ਕੋਮਲਪ੍ਰੀਤ ਨੇ ਕਥਿਤ ਤੌਰ ’ਤੇ ਸਮਾਜਿਕ ਰੁਤਬਾ ਹਾਸਲ ਕਰਨ ਅਤੇ ਕਿਸੇ ਅਮੀਰ ਪਰਿਵਾਰ ਵਿੱਚ ਵਿਆਹ ਕਰਵਾਉਣ ਲਈ ਇਹ ਫ਼ਰਜ਼ੀ ਪਛਾਣ ਬਣਾਈ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਇਸੇ ਪਛਾਣ ਦੇ ਆਧਾਰ ’ਤੇ ਉਸ ਨੇ ਕਰੀਬ ਇੱਕ ਮਹੀਨਾ ਪਹਿਲਾਂ ਇੱਕ ਅਮੀਰ ਘਰਾਣੇ ਵਿੱਚ ਵਿਆਹ ਵੀ ਕਰਵਾ ਲਿਆ ਸੀ।
ਮਾਮਲੇ ਦਾ ਭੇਤ ਉਸ ਸਮੇਂ ਖੁੱਲ੍ਹਿਆ ਜਦੋਂ ਕੋਮਲਪ੍ਰੀਤ ਮੋਗਾ ਸਿਟੀ-1 ਥਾਣੇ ਨੇੜੇ ਸਾਂਝ ਕੇਂਦਰ ਵਿੱਚ ਆਪਣਾ ਟਿਫ਼ਨ ਛੱਡਣ ਲਈ ਨਿਯਮਤ ਤੌਰ ’ਤੇ ਆਉਂਦੀ ਸੀ। ਉਹ ਪੁਲੀਸ ਕਰਮਚਾਰੀਆਂ ਨੂੰ ਦੱਸਦੀ ਸੀ ਕਿ ਉਸਦੀ ਮੁੱਖ ਚੌਂਕ ਵਿੱਚ ਟ੍ਰੈਫਿਕ ਡਿਊਟੀ ਲੱਗੀ ਹੈ। ਕਰੀਬ ਇੱਕ ਘੰਟੇ ਬਾਅਦ ਉਹ ਟਿਫ਼ਨ ਵਾਪਸ ਲੈ ਜਾਂਦੀ ਸੀ।
ਸ਼ੱਕ ਹੋਣ ’ਤੇ ਪੁਲੀਸ ਨੇ ਉਸਦੀ ਡਿਊਟੀ ਰੋਸਟਰ ਅਤੇ ਤਾਇਨਾਤੀ ਦੀ ਜਾਂਚ ਕੀਤੀ, ਪਰ ਉਸਦਾ ਕੋਈ ਰਿਕਾਰਡ ਨਹੀਂ ਮਿਲਿਆ। ਪੁੱਛਗਿੱਛ ਦੌਰਾਨ ਉਸਦੇ ਜਵਾਬ ਵੀ ਸ਼ੱਕੀ ਪਾਏ ਗਏ।
ਤਲਾਸ਼ੀ ਦੌਰਾਨ ਉਸ ਕੋਲੋਂ ਪੰਜਾਬ ਪੁਲੀਸ ਦੀ ਵਰਦੀ, ਦੋ ਵਾਕੀ-ਟਾਕੀ ਸੈੱਟ ਅਤੇ ਇੱਕ ਫ਼ਰਜ਼ੀ ਵਿਭਾਗੀ ਪਛਾਣ ਪੱਤਰ ਬਰਾਮਦ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ। ਪੁਲੀਸ ਹੁਣ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਇਸ ਫ਼ਰਜ਼ੀ ਪਛਾਣ ਰਾਹੀਂ ਉਸ ਨੇ ਕਿਸੇ ਤੋਂ ਪੈਸੇ ਜਾਂ ਹੋਰ ਲਾਭ ਹਾਸਲ ਕੀਤਾ। ਮਾਮਲੇ ਵਿੱਚ ਜਾਲਸਾਜ਼ੀ ਅਤੇ ਸਰਕਾਰੀ ਪਛਾਣ ਦੀ ਕਥਿਤ ਦੁਰਵਰਤੋਂ ਸਬੰਧੀ ਧਾਰਾਵਾਂ ਤਹਿਤ ਕਾਰਵਾਈ ਕੀਤੀ ਗਈ ਹੈ।
